Suvaysh kanali orqali ikki yo‘nalishda ham kemalar harakati 29-mart, dushanba oqshomidan qayta tiklandi. Bu haqda kanal ma’muriyatiga tayanib, “RBK” xabar berdi.

Foto: Reuters

Xabarga ko‘ra, Suvaysh kanali yaqinida to‘planib qolgan kemalarning 110 dan ortig‘ini 30 mart, seshanba kuni ertalabgacha o‘tkazib yuborish rejalashtirilgan.

“Kema halokatida kanalning aybi yo‘q. Hodisa yuzasidan o‘tkazilgan tekshiruvda kim tovon to‘lashi kerakligi aniqlanadi”, — dedi kanal ma’muriyati rahbari Usama Rabi.

Suvaysh kanali ma’muriyatining yana bir rahbari, Misr prezidenti maslahatchisi Moxab Mamish kanalning to‘silib qolishida Ever Given kemasi kapitanini aybdor deb atadi. Uning so‘zlariga ko‘ra, kuchli shamol tufayli ekipaj kemani boshqara olmagani uchun kema orqaga burilib, kanalni to‘sib qo‘ygan. Ma’muriyat vakili, shuningdek, voqeada Suvaysh kanali rahbariyatining aybini inkor etdi.

Reuters’ning Misr televideniyesiga asoslanib, xabar berishicha, hozirda kamida 400 ta kema kanaldan o‘tish uchun navbat kutmoqda. Ular orasida o‘nlab konteyner kemalari, neft tankerlari va suyultirilgan gaz tashuvchi kemalar bor.

Avvalroq Misr prezidenti Abdul-Fattoh as-Sisi Ever Given kemasining sayozlikka tiqilib qolishi oqibatida to‘sib qo‘yilgan Suvaysh kanalini blokdan chiqarish ishlari muvaffaqiyatli yakunlanganini e’lon qilgan edi. Ever Given kemasi sayozlikdan chiqarilgan.

Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan edi, deb yozadi Bloomberg.

Kema ushbu kanal orqali harakatni butunlay to‘xtatib qo‘ygandi. Dastlab kemalar qatnaydigan yo‘lni ochishga ikki-uch kun ketishi taxmin qilingan edi. Ammo Ever Given’ni sayozlikdan chiqarib olishga urinayotgan Boskalis kompaniyasi rahbari Piter Berdovski bunga haftalab vaqt ketishi mumkinligini aytgandi.

Keyinroq Ever Given konteyner tashuvchi kemasi atrofidagi suv tubini qazish ishlari boshlandi. Kema 26-mart kuni kechqurun o‘z joyidan biroz siljitildi.

Kemalar qatnovi bo‘yicha Lloyd’s List kompaniyasi hisob-kitoblariga ko‘ra, Suvaysh kanalida sayozlikka tiqilib qolgan Ever Given konteyner tashuvchi kemasi tomonidan kemalar yo‘lining to‘sib qo‘yilishi jahon savdosiga soatiga 400 million dollarga tushayotgan edi. Misrning Ever Given bilan bog‘liq vaziyatdan ko‘rayotgan talafoti kuniga 14 million dollarga baholangan.