Россия президенти Владимир Путин коронавирус билан касалланган Аргентина раҳбари Альберто Фернандесга қўнғироқ қилиб, ҳол-аҳвол сўради. Бу ҳақда Кремль расмий сайтига таяниб, «РБК» хабар берди.
«Владимир Путин Альберто Фернандесни ўтган туғилган куни билан табриклаб, унга тезроқ ва тўлиқ соғайиб кетишни тилади», — дейилади Кремль хабарида. Суҳбат давомида Аргентина президенти коронавирусга қарши Россиянинг «Спутник V» вакцинаси билан эмлангани сабабли касаллик симптомларсиз кечаётганини таъкидлаб ўтди.
Аргентинанинг Infobae ва Clarin нашрлари икки давлат раҳбарлари ўртасидаги суҳбат, тахминан, 30 дақиқа давом этганини хабар қилмоқда. Путин, ўз навбатида, препаратни етказиб беришни давом эттиришга ваъда берди. Бундан ташқари, Путин россиялик шифокорларни Аргентинага юбориш таклифини билдирди.
Суҳбат чоғида икки мамлакат раҳбарлари жаҳонда кечаётган сиёсий вазият билан боғлиқ масалалар, шунингдек, Аргентинанинг Халқаро валюта фонди билан музокаралари тўғрисида доимий фикр алмашишга келишиб олди.
Аргентина «Спутник V»дан фойдаланишни иккинчи бўлиб тасдиқлаган эди. Мамлакатда препарат 2020 йил декабрь ойининг охирида рўйхатдан ўтказилган. Аргентина Вазирлар маҳкамаси раҳбари Сантьяго Каферонинг Twitter’да келтирган маълумотларига кўра, 5 апрелгача мамлакатга 7 миллион дозадан ортиқ «Спутник V» вакцинаси етказиб берилди.
Январь ойида Аргентина президенти «Спутник V» билан эмланган эди. 3 апрелда Фернандесда коронавирус борлиги тасдиқланди. «Спутник V» препаратини ишлаб чиқарувчи Гамалея маркази эмлаш касалликни оғир аломатларсиз енгишга ва тезроқ тузалишга ёрдам бериши кераклигини таъкидлади. Аргентина раҳбарининг ўзи унда касаллик симптомларсиз кечаётганини айтди. Шифокорлар Фернандеснинг қони кислородга тўйингани ва таҳлиллари яхши чиққанини маълум қилди.
Изоҳ (0)