Suvaysh kanalini to‘sib qo‘ygan Ever Given kemasining egasi ishni sudga oshirmaslik uchun zararni qoplab bermoqchi

Suvaysh kanalini bir haftaga to‘sib qo‘ygan Ever Given kemasining egasi ishni sudga oshirmaslik va murosa bitimi tuzish uchun tovon puli to‘lamoqchi. Bu haqda Misr prezidentining dengiz portlari va Suvaysh kanalini rivojlantirish bo‘yicha maslahatchisi admiral Moxab Mamishga tayanib, “RBK” xabar berdi.

“Yo‘q, vaziyat sud jarayoniga yetib bormaydi, kemaning egasi murosa bitimi tuzib, tovon to‘lamoqchi”, — dedi Mamish va voqea yuzasidan tekshiruvlar katta ehtimol bilan bir hafta ichida yakunlanishini qo‘shimcha qildi.

Rasmiyning so‘zlariga ko‘ra, kema egasining Suvaysh kanalini to‘sib qo‘ygani uchun ixtiyoriy ravishda tovon to‘lashi kema kapitanining hibsga olinishi va unga nisbatan tegishli qonuniy choralar qo‘llanilishining oldini oladi.

Shuningdek, Mamish Ever Given tufayli kanalning kirish qismida to‘xtab qolgan kemalar egalariga sug‘urta kompaniyalari tomonidan kompensatsiya to‘lanishini ta’kidladi.

Willis Re International sug‘urta vositachisiga asoslanib, Reuters Suvaysh kanalining to‘sib qo‘yilishi yirik sud jarayonlari va dengiz sug‘urtasi stavkalarining ko‘tarilishiga olib kelishi mumkinligini aytgan edi. Fitch reyting agentligi sug‘urtalovchilarga qarshi da’volar yuzlab million yevroga yetishi mumkinligi haqida xabar bergan.

Avvalroq Suvaysh kanalining to‘silib qolishi oqibatida yetgan zarar 1 mlrd dollarga baholangan edi. “Bu haqli ravishda davlatga tegishli mablag‘”, — deb qo‘shimcha qilgan kanal ma’muriyati rahbari.

Allianz nashri Suvaysh kanalining to‘silib qolishidan jahon savdosiga yetkazilgan zararni haftasiga 6-10 milliard dollar, deb baholagan.

Shuningdek, kemalar qatnovi bo‘yicha Lloyd’s List kompaniyasi hisob-kitoblariga ko‘ra, Suvaysh kanalida sayozlikka tiqilib qolgan Ever Given konteyner tashuvchi kemasi tomonidan kemalar yo‘lining to‘sib qo‘yilishi jahon savdosiga soatiga 400 million dollarga tushayotgan edi. Misrning Ever Given bilan bog‘liq vaziyatdan ko‘rayotgan talafoti kuniga 14 million dollarga baholangan.

Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan. Shuningdek, hodisa ortidan neft narxi keskin o‘sgan.

Suvaysh kanali orqali ikki yo‘nalishda ham kemalar harakati 29-mart, dushanba oqshomidan qayta tiklandi. Suvaysh kanali ma’muriyatining yana bir rahbari, Misr prezidenti maslahatchisi Moxab Mamish kanalning to‘silib qolishida Ever Given kemasi kapitanini aybdor qildi.