Қозоғистон президенти Қосим-Жўмарт Тўқаев коронавирусга қарши Қарағанда фармацевтика заводида ишлаб чиқарилган «Спутник V» вакцинаси билан эмланди. Айни пайтда у ўзини яхши ҳис қилмоқда. Бу ҳақда матбуот котиби Берик Уалига таяниб, «РИА-Новости» хабар берди.
«Бугун давлатимиз раҳбари Қарағанда фармацевтика заводи томонидан ишлаб чиқарилган ‘Спутник V’ вакцинасини қабул қилди. Эмлашдан сўнг у ўзини яхши ҳис қилмоқда. Иккиламчи таъсирлар йўқ», — деб ёзди Уали ўзининг Facebook саҳифасида.
Матбуот котибининг сўзларига кўра, президент Қозоғистон фуқароларини эмлаш ва жамоавий иммунитетни шакллантириш билангина коронавирусни енгиш мумкинлигига ишонч билдирмоқда. Таъкидланишича, фақат шу орқали барча чекловлар олиб ташланиб, фуқароларнинг одатий ҳаёти ва иқтисодий фаолиятининг тикланишини таъминлаш мумкин.
«Давлатимиз раҳбари яна бир бор барча фуқароларни иложи борича тезроқ вакцина олишга чақиради. Бу ўзингизни ва яқинларингизни инфекциядан ҳимоя қилишнинг ягона йўли. Аввалроқ президент ҳукумат ва маҳаллий ижро этувчи органларга хориждан вакциналар етказиб беришни таъминлаш ва маҳаллий ишлаб чиқаришни йўлга қўйиш, шунингдек, эмлаш жараёнини ташкил этиш тўғрисида кўрсатма берган эди», — деди Уали.
Эслатиб ўтамиз, Қозоғистонда коронавируснинг янги мутацияси пайдо бўлган бўлиши мумкин. Уни ҳозирча шартли равишда «олмаотача» штамм деб номлашди.Аввалроқ Қозоғистоннинг Олмаота шаҳрида 21 мартдан буён амал қилиб келаётган карантин чекловлари узайтирилди. Шаҳар бош санитар шифокори Жандарбек Бекшин тегишли қарорни имзолади. Шунингдек, Жандарбек Бекшин 26 март куни Олмаотада коронавируснинг янада юқумлироқ деб ҳисобланувчи «британча» ва «жанубий африкача» штаммларига хос бўлган мутациялар аниқланганини маълум қилди.
Қозоғистонда 1 февралдан аҳолини коронавирусга қарши эмлаш бошланди. Мамлакат аҳолиси «Спутник V» вакцинаси билан эмланмоқда. Ҳозирда Россиянинг вакцинаси Қозоғистондаги Қарағанда фармацевтика мажмуаси томонидан ишлаб чиқарилмоқда.
Изоҳ (0)