Қорақалпоғистоннинг Қонликўл туманидаги 1-сонли давлат мактабгача таълим ташкилотининг ходимлари томонидан ташкилот раҳбарини лавозимдан олиш учун кўчада намойиш уюштирилгани ҳақида хабар берилганди. Воқеа юзасидан Мактабгача таълим вазирлиги баёнот берди.
Мазкур ҳолат юзасидан Мактабгача таълим вазирлигининг ички аудит хизмати томонидан Қонликўл туманидаги давлат мактабгача таълим ташкилотида 2021 йил январь ойида ўрганиш ўтказилди. 1-сонли ДМТТнинг директори Э.Бекбергенова ўз лавозимида 2018 йил 31 январдан 2020 йил 21 декабрга қадар ишлаб келган. Директорнинг устидан ходимлар томонидан келиб тушган шикоятларни ўрганиш мақсадида ишчи гуруҳ шакллантирилди.
Ўрганиш давомида МТТ раҳбари томонидан 399,2 миллион сўмлик молиявий хато-камчиликларга йўл қўйилганлиги маълум бўлди. Жумладан:
- ДМТТга ҳар хил лавозимларга ишга расмийлаштирилган 5 нафар фуқаро ДМТТда ишламаган ва вазифа бажармаган бўлса-да, уларнинг номига 24,0 миллион сўм иш ҳақи ёзилиб тўланган;
- 2018—2021 йилларда 33 нафар ходимнинг мутахассислиги тўғри келмаса-да, қўшимча иш вазифалари нотўғри юкланиб ҳамда ушбу вазифалар бажарилмаган бўлса-да, уларга 28,9 миллион сўм иш ҳақи ортиқча тўланган;
- 16 нафар ходимга 1,0 бирликдан ортиқ иш-вазифалар юкланиб, иш-вазифалар учун тўланган 46,9 миллион сўм иш ҳақи ходимларнинг тушунтириш хатларига кўра Click хизмати орқали ДМТТ мусиқачиси ва ДМТТ директори Э.Бекбергенованинг пластик карточкасига ўтказиб берилган ҳамда шундан 8,5 миллион сўм иш ҳақи ҳақиқатда бажарилмаган иш ҳажми учун тўланган.
ДМТТ директори 3,63 бирлик штат бирликларига ходим олмасдан ва бўш иш ўрни бўйича тегишли меҳнат органларига ҳисоботлар топширмасдан меҳнат қонунчилиги бузилган.
ДМТТ директори Э.Бекбергенова томонидан бир нафар тарбиячи-ёрдамчига 2018 йил октябрь ойидан 2019 йил декабрь ойигача ўзининг уйида ҳар хил турдаги маиший ишларни, 2 нафар қоровулга 2020 йилнинг 5 ойи давомида ўзининг эски уйини буздириб, янги уй қурдирган бўлса-да, ушбу давр мобайнида иш вазифасини бажармаган 2 нафар қоровулга ва 1 нафар тарбиячи-ёрдамчига бюджет ҳисобидан жами 16,1 миллион сўм иш ҳақи ортиқча тўланган ва ДМТТ учун ажратилган штат бирликларидан ўз манфаат йўлларида фойдаланган.
Марказлаштирилган молия-бухгалтерия хизмати томонидан меҳнатга ҳақ тўлаш меъёрларига амал қилинмасдан 1,9 миллион сўм иш ҳақи ортиқча тўланган.
Озиқ-овқат маҳсулотларини кунлик таомномаларга қўшиб ёзиш натижасида 7,3 миллион сўмлик озиқ-овқат маҳсулотлари асоссиз ҳисобдан чиқарилган. 2018—2020 йилларда 5,7 миллион сўмлик озиқ-овқат маҳсулотлари меъёрдан кўп таомномага киритилиб, ортиқча ҳисобдан чиқарилган.
ДМТТ моддий жавобгар шахси ҳамда марказлаштирилган молия-бухгалтерия хизмати ходимлари томонидан назорат ташкил этилмаганлиги натижасида 5,2 миллион сўмлик озиқ-овқат ва 50,9 миллион сўмлик товар-моддий бойликлар камомади ҳамда 0,7 миллион сўмлик озиқ-овқат маҳсулотлари ортиқчалигига йўл қўйилган.
ДМТТ омбор мудири ва ошпазлари тушунтириш хатларига кўра, ДМТТда 2018—2020 йилларда таомномада ёзилган гўшт ва сут маҳсулотларининг ярими, яъни 4932 килограмм 159,6 миллион сўмлик гўшт ҳамда 15 504,5 литр 53,1 миллион сўмлик сут маҳсулотлари қозонга солинмаган.
Ўрганиш ҳужжатлари қонуний қарор қабул қилиш учун Ўзбекистон Бош прокуратураси ҳузуридаги Иқтисодий жиноятларга қарши курашиш департаментининг Қонликўл туман бўлимига топширилган. Шунингдек, мудира вазирлик буйруғига асосан 2020 йил 21 декабрда лавозимидан озод этилди.
Бироқ 24—25 март кунлари суд қарори асосида Э.Бекбергенова лавозимига қайта тикланган. Шундан сўнг МТТ ходимлари ўз норозилик намойишларини уюштирган. 5 апрель куни Қорақалпоғистон МТВнинг маълум қилишича, 1-сонли МТТ директори Э.Бекбергенова қайта лавозимидан четлаштирилди.
Бундан аввал Бухорода қурилиш фирмаси мактабга арзон электр чироқларини ўрнатиш орқали 84 миллион сўм бюджет маблағларини талон-торож қилгани, Зангиотадаги боғча мудираси ишламаган 37 кишининг 983,5 миллион сўм ойлигини ўзлаштиргани аниқлангани ҳамда Фарғонада 2 туп чинор ва бир туп толни ноқонуний кестирган боғча мудирасига 15 миллион сўм жарима ёзилгани ҳақида хабар берилганди.
Изоҳ (0)