Ўзбекистонда ички ишлар органлари фаолиятини ташкил этишнинг «мутлақо янги механизмлари» жорий этилади. «Gazeta.uz»нинг ёзишича, бу Президентнинг 26 мартдаги фармонида кўзда тутилган. Ҳужжат «жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашишнинг яхлит тизимини шакллантириш» ҳамда «ички ишлар органларининг энг қуйи бўғинидан республика даражасигача самарали фаолиятини йўлга қўйиш ва замонавий иш услубларини жорий этиш»га қаратилган.
Аввалроқ ушбу фармон билан Ички ишлар вазирлиги тузилмаси қайта кўриб чиқилгани ҳақида хабар берилган эди — бошқармалар ва хизматлар департаментларга бирлаштирилади (шу жумладан, Жазони ижро этиш бош бошқармаси Жазони ижро этиш департаменти этиб қайта ташкил этилади), ички ишлар органларининг таянч пунктлари негизида маҳалла ҳуқуқ-тартибот масканлари ташкил этилади, Тошкент ва Самарқанд вилоятларида профилактика инспекторига масофадан туриб, мурожаат юбориш имконини берувчи «Смарт маҳалла» ахборот дастури ишга туширилади.
Ички ишлар органлари тизимини янада такомиллаштириш бўйича «йўл харитаси»га кўра, 2021 йилнинг апрель ойи охиригача Жамоат хавфсизлиги концепцияси лойиҳаси ишлаб чиқилиши кутилмоқда. Ҳужжатда патруль-пост ва йўл-патруль хизматлари, ҳуқуқбузарликлар профилактикаси ва пробация хизматлари бўлинмаларининг ўзаро ҳамкорликда ишлаши бўйича янги механизмлари белгиланади.
Бундан ташқари, Миллий гвардия бўлинмаларининг жамоат тартибини сақлаш тизимидаги ваколатлари ва шахсий жавобгарлиги белгиланиши лозим (Миллий гвардия тўғрисидаги қонун декабрь ойида қабул қилинган эди).
Янги тизим, шунингдек, пробация бўлинмаларининг фаолияти самарадорлигини оширишни ҳам кўзда тутади. Пробация назоратидаги шахсларнинг хулқ-атворини кунлик назорат қилишда профилактика инспекторлари билан ҳамкорлик механизмлари жорий этилади. Туман ва шаҳар пробация бўлинмалари тегишинча туман ва шаҳар ички ишлар органларининг бевосита бўйсунувига ўтказилади.
Фармон билан қуйидаги лавозимлар тугатилди:
- Қорақалпоғистон ички ишлар вазирининг, вилоят, туман ва шаҳар ички ишлар органлари бошлиқларининг жамоат тартибини сақлаш бўйича ўринбосари;
- Қорақалпоғистон ички ишлар вазирининг, вилоят, туман ва шаҳар ички ишлар органлари бошлиқларининг ўринбосари — ҳуқуқбузарликлар профилактикаси бошқармаси (бўлими) бошлиғи;
- вилоят ички ишлар бошқармаси (бош бошқармаси) бошлиқларининг пробация ва жазони ижро этиш масалалари бўйича ўринбосари.
Ушбу лавозимнинг асосий вазифалари — патруль-пост ва йўл-патруль хизмати бўлинмалари фаолиятини, шунингдек, маҳаллалар ва жамоат жойларида манзилли профилактик тадбирлар ўтказилишини мувофиқлаштириш ҳамда муқаддам судланган ва пробация ҳисобига олинган шахслар билан ишлаш ҳамда ички ишлар органларининг тунги хизматини ташкил этиш.
Изоҳ (0)