Фарғона вилоятининг Бағдод туманида пулларни қалбакилаштириш билан шуғулланган шахсга жиноят иши қўзғатилди. Бу ҳақда ИИВ Тергов департаменти хабар берди.
Маълум қилинишича, Бағдод тумани ИИБ ЖҚБ ходимлари томонидан 1 апрель куни ўтказилган тезкор тадбирда 36 ёшли М.М. шартли равишда харидор сифатида жалб қилинган фуқарога 2,7 миллион сўм эвазига 99 дона 100 минг сўмлик купюрадан иборат жами 9,9 миллион сўм қийматига тенг сохта пулларни сотган вақтида ушланган.
Тергов ҳаракатлари давомида М.М.нинг яшаш хонадони холислар иштирокида кўздан кечирилиб, сохта пулларни тайёрлашда фойдаланилган бир дона Lenovo русумли ноутбук ва HP русумли рангли принтер ҳамда 5000 сўмлик купюрадаги 200 дона жами 1 миллион сўм сохта пуллар ашёвий далил тариқасида расмийлаштириб олинган.
М.М.га нисбатан Жиноят кодексининг 176-моддаси 1-қисми (қалбаки пуллар ясаш, уларни ўтказиш) билан жиноят иши қўзғатилган. Ҳозирда тергов давом этмоқда.
Маълумот учун, Жиноят кодексида ушбу жиноятни содир этганлик учун 2 йилдан 5 йилгача озодликни чеклаш ёхуд 5 йилгача озодликдан маҳрум қилиш жазоси белгиланган.
Аввалроқ Фарғонада қалбаки 100 долларлик купюрани муомалага киритмоқчи бўлган шахсга жиноят иши қўзғатилгани, қалбаки 25 минг долларни муомалага киритмоқчи бўлган шахслар ушлангани ҳақида хабар берилган эди.
Изоҳ (0)