Андижон вилоятининг Избоскан туманида 68 ёшли фуқаро дўсти билан жанжаллашиб қолиб, уни хўжалик пичоғи билан ўлдириб қўйди. Бу ҳақда туман ҳокимлиги ахборот хизматига таяниб «Дарё» мухбири хабар берди.
Таъкидланишича, 2021 йилнинг 24 март куни соат 15:00 да Избоскан тумани Пойтуғ шаҳрида жойлашган ҳаммомларнинг бирида Алишер Навоий номидаги маҳаллада истиқомат қилган 68 ёшли фуқаро А.Б. дўсти А.Ғ. билан ўзаро жанжаллашиб қолган.
Жанжал вақтида А.Б. дўсти А.Ғ.ни қаттиқ ҳақорат қилиб, сўкиб юборган. А.Ғ.нинг бундан жаҳли чиқиб, ёнида бўлган хўжалик пичоғи билан А.Б.нинг қорин қисмига бир маротаба уриб, тан жароҳати етказган.
Шу куннинг ўзида А.Б. Избоскан туман шифохонасининг жонлантириш бўлимига олиб келинган. Бироқ кўрсатилган тиббий муолажаларга қарамасдан фуқаро А.Б. шифохонада вафот этган.
Мазкур ҳолат юзасидан Избоскан туман ИИБ тергов бўлими томонидан Жиноят кодексининг 104-моддаси 3-қисми (қасддан баданга оғир шикаст етказиш) билан жиноят иши қўзғатилиб, 68 ёшли отахонга нисбатан қамоққа олиш эҳтиёт чораси қўлланилган.
Мавзуга доир:
Изоҳ (0)