Ўзбекистон Президенти Шавкат Мирзиёев 5 апрель куни халқаро «Иннопром» саноат кўргазмасида иштирок этиш учун Тошкент шаҳрида бўлиб турган Россия саноат ва савдо вазири Денис Мантуров бошчилигидаги делегацияни қабул қилди.
Таъкидланишича, «Иннопром» Россия ҳукумати томонидан иқтисодиётнинг турли тармоқларида илғор технологиялар ва замонавий ишланмаларни биргаликда илгари суриш мақсадида ўтказиб келинаётган энг йирик кўргазма ҳисобланади. Ушбу тадбир Ўзбекистонда биринчи марта ўтказилмоқда.
Учрашувда Ўзбекистон ва Россия ўртасидаги кенг кўламли амалий ҳамкорликни янада кенгайтириш, стратегик шериклик муносабатларини мустаҳкамлашнинг долзарб масалалари муҳокама қилинди.
Денис Мантуров давлат раҳбарига икки мамлакатнинг етакчи саноат компаниялари ва банк-молия институтлари иштирокида йирик кооперация лойиҳаларини амалга ошириш бўйича биргаликда амалга оширилаётган ишларнинг натижалари тўғрисида маълумот берди.
Суҳбат чоғида бизнес ва ҳудудлар даражасидаги кўп қиррали шерикликни мустаҳкамлаш, иқтисодиётнинг турли тармоқларидаги ҳамкорликни кенгайтириш ва янги лойиҳаларни амалга оширишга алоҳида эътибор қаратилди.
Тошкентда «Иннопром» кўргазмасининг муваффақиятли ўтказилиши ушбу вазифаларни бажаришга хизмат қилиши таъкидланди.
Бундан аввал Шавкат Мирзиёев Эрон ташқи ишлар вазири Муҳаммад Жавод Зарифни қабул қилганди.
Изоҳ (0)