Тошкент метросига Россиядан яна 10 та поезд келтирилади

Тошкент метрополитени ва «VEB.RF» корпорацияси Россиянинг «Трансмашҳолдинг» компанияси томонидан ишлаб чиқарилган 10 та метро поездини етказиб бериш бўйича кредит шартномасини имзолади, деб хабар берди «Gazeta.uz».

Кредит ҳажми 12 йил муддатга 30,4 миллион еврони ташкил этади. Шартномани имзолаш Тошкент шаҳрида 5—7 апрель кунлари бўлиб ўтадиган «Иннопром» халқаро саноат кўргазмасининг бизнес дастури доирасида амалга оширилади.

Дастлабки бешта поездни ёзда етказиб бериш режалаштирилган. Таркиб Москва яқинидаги «Метровагонмаш» заводида ишлаб чиқарилган. Янги метро поездлари тўртта вагондан иборат.

Келтириладиган поездда вагонлар орқали эркин ҳаракатланиш мумкин. Бош вагонларда ногиронлар аравачаси учун жойлар мавжуд. Ҳар бир йўловчилар бўлинмаси бекатни қидириш, йўналишни режалаштириш ва йўл вақтини ҳисоблаш учун интерактив қидириш қобилиятига эга сенсор экранли ахборот мониторлари билан жиҳозланган.

Йўловчи салонлари ва ҳайдовчи кабиналари видеокузатув, кондиционер ва ҳавони зарарсизлантириш тизимлари билан жиҳозланган. Метро вагонлари ва ромларининг ишлаш муддати 30 йил. Ҳайдовчилар кабинасининг олд ойнаси, бир қисми ер юзида ҳаракатланадиган Тошкент метросининг ўзига хос хусусиятларини инобатга олган ҳолда, қўлда созланиши мумкин бўлган қуёш нурларидан ҳимоя қилувчи тизим билан таъминланади.

Эслатиб ўтамиз, 2019 йилнинг ноябрь ойида Тошкент метроси учун олиб келинган Россиянинг «Метровагонмаш» компанияси томонидан ишлаб чиқарилган янги поездлар ишга туширилган эди.