Кубанинг Гуантанамо префекурасида жойлашган ҳарбий базадаги қамоқхонанинг энг махфий бўлими ҳисобланадиган 7-лагердаги барча маҳбуслар бошқа бўлимга ўтказилди. Бу ҳақда АҚШ жанубий қўмондонлиги сайтига таяниб, «РБК» хабар берди.
Associated Press маълумотларига кўра, 7-лагер 2006 йилда ташкил этилган бўлиб, унда энг хавфли маҳбуслар сақланган. Хусусан, лагердаги маҳбусларга «сўроқ қилишнинг ўта оғир усуллари» қўлланилгани ҳақида айтиб ўтилган. Узоқ вақт давомида ҳарбийлар Гуантанамо қамоқхонасида 7-лагер мавжудлигини инкор қилиб келган.
Жанубий қўмондонликнинг сўзларига кўра, қамоқхона маъмурлари «барча маҳбусларни хавфсиз ва бехавотир ҳолда 7-лагердан 5-лагерга кўчириб ўтказган». Шундай қилиб, Гуантанамодаги барча 40 маҳбус энди учта эмас, иккита бўлимда сақланади, бу эса «қамоқхона харажатларини» камайтиради.
Баёнотда айтилишича, мазкур ўзгариш «кучларнинг ҳимояси ва хавфсизлигига таҳдид солмайди ёки маҳкумларга нисбатан хавфсиз, қонуний ва инсонпарвар муносабатларни таъминлаш вазифасини бузмайди».
2021 йилнинг февраль ойида Оқ уй матбуот котиби Жен Псаки АҚШ президенти Жо Байден маъмурияти Гуантанамо қамоқхонасини ёпмоқчи эканини эълон қилди. Reuters хабарига кўра, яқин ҳафталар ёки ойларда Байден қамоқхона тақдирини қайта белгилайдиган ҳужжатни имзолайди.
Маълумот учун, Гуантанамо ҳарбий базасидаги халқаро террорчилар жазони ўтайдиган қамоқхона АҚШнинг собиқ президенти Жорж Буш томонидан 2001 йилдаги 11 сентябрь терактларидан сўнг терроризмда айбланган жиноятчиларни жазога маҳкум қилиш учун 2002 йил очилган. 2003 йилда Гуантанамодаги қамоқхонада деярли 700 нафар маҳбус сақланган.
Собиқ президент Барак Обаманинг 2008 йилдаги биринчи сайлов кампаниясидаги асосий сайловолди ваъдаларидан бири мазкур қамоқхонани ёпиш бўлганди. Кейинчалик Обаманинг таклифи Конгресс томонидан маъқулланмаган. Обаманинг сўзларига кўра, 2016 йилда қамоқхона учун 445 миллион доллар сарфланган, собиқ президент буни пулни беҳуда исроф қилиш деб атаган.
Дональд Трамп ушбу қамоқхонадаги маҳбусларни ўта хавфли деб атаган ва 2018 йилнинг январида қамоқхонани сақлаб қолиш ҳақида фармон имзолаган. БМТ маълумотига кўра, ҳозир Гуантанамода 40 нафар маҳбус бор, улардан фақат тўққиз нафарига айблов эълон қилинган ёки ҳукм чиқарилган. Ҳуқуқ ҳимоячилари ушбу объектни ёпишни талаб қилмоқда.
Изоҳ (0)