Россия президенти Владимир Путин ўзига яна давлат раҳбарлиги лавозимини эгаллаш учун сайловларда иштирок этиш имконини бериш назарда тутилган қонунни имзолади. Бу ҳақда «Коммерсантъ» хабар берди.
Хабарга кўра, қонун лойиҳаси Россия конституциясига ўзгартиришлар киритишни қувватлаш доирасида ишлаб чиқилган, давлат Думаси уни 24 март куни учинчи ўқишдан кейин, федерация кенгаши эса 31 мартда тасдиқлаган.
Энди Россия президенти лавозимини конституциядаги ўзгаришлар кучга киргунига қадар эгаллаб турган шахсларнинг икки муддатга президентликка сайланиш тақиқи олиб ташланди. Яъни, конституциядаги ўзгариш бўйича бир шахс Россияда икки мартадан ортиқ президент бўлиши мумкин эмас, бироқ тузатишлардан бирига кўра, ушбу чеклов конституциядаги тузатишлар кучга киргунига қадар давлат раҳбари бўлиб ишлаганларга нисбатан қўлланилмайди. Шунингдек, қонун лойиҳаси билан Марказий сайлов комиссияси раиси ва депутатларга янги талаблар жорий қилинмоқда: МСКга 30 ёшга тўлган, Россия фуқаролигига эга шахс раҳбарлик қилиши мумкин, депутатлар эса доимий равишда мамлакатда яшаши шарт.
Россиянинг янгиланган конституцияси 2020 йил июль ойида мамлакат миқёсидаги референдумдан кейин қабул қилинган. Россиянинг асосий қонунига ўзгартиришлар киритилиши учун референдум иштирокчиларининг 77,92 фоизи, мазкур қайдлар киритилмаслиги учун эса 21,27 фоизи овоз берган.
Изоҳ (0)