Иордания собиқ валиаҳд шаҳзодаси давлат тўнтаришига уринишда хорижий давлатлар билан тил бириктиргани маълум қилинди

Иорданиянинг собиқ валиаҳд шаҳзодаси Ҳамза ибн Ҳусайннинг атрофидаги одамлар «хорижий кучлар» билан алоқа ўрнатиб, биргаликда қирол Абдулла II ни тахтдан ағдаришни режалаштиришган. Бу ҳақда бош вазир ўринбосари ва ички ишлар вазири Айман Сафади матбуот анжуманида маълум қилди, деб ёзади «РБК».

Сафадининг айтишича, махсус хизмат шаҳзода Ҳамза ва бошқа фитначиларнинг хатти-ҳаракатларини узоқ вақт давомида кузатиб келган. «Суриштирув мобайнида, фитначиларнинг чет элдагилар билан давлат тўнтаришини бошлаш ва мамлакатдаги вазиятни беқарорлаштириш учун энг муносиб вақтни танлаш тўғрисидаги муҳокамалари аниқланди», — деди бош вазир ўринбосари.

Унинг айтишича, дастлабки суриштирувлар шуни кўрсатдики, Ҳамзанинг атрофидаги одамлар бошқа штатлардан, шу жумладан «хорижий мухолифат деб аталмиш» шахслардан, ахборот тўлдириш ва провокацияларда фойдаланиш учун уларга мурожаат қилган.

«Бу ҳаракатлар шаҳзода Ҳамзанинг сўнгги пайтларда жамоат арбоблари билан фаол алоқада бўлган вақтга тўғри келди. Унинг мақсади жамоат арбобларини Иордания миллий хавфсизлигини беқарорлаштиришга ундаш ва провокация бўлган. Шаҳзода ўз ҳаракатларини собиқ молия вазири Басем Авадалла билан мувофиқлаштиргани исботланди», — дея қўшимча қилди бош вазир ўринбосари.

Бундан ташқари, у фитначиларнинг режалаштириш босқичидан бевосита монархни ағдаришга уриниш ҳаракатларига ўтган пайтида ҳибсга олинганини айтди. Сафадининг таъкидлашича, Абдулла II аввал қирол оиласининг ўзида бу масалани ҳал қилиш учун собиқ валиаҳд шаҳзода билан шахсан гаплашишга қарор қилган.

Қирол Ҳусайннинг беваси, шаҳзода Ҳамзанинг онаси Нур ал-Ҳусайн ўғлига қарши айбловларни «ёвуз туҳмат» деб даъво қилмоқда. Бу ҳақда у ўзининг Twitter’ида ёзган. «Ушбу ёвуз туҳматнинг барча бегуноҳ қурбонлари учун ҳақиқат ва адолат ғалаба қозонишини илтижо қиламан. Худо уларни паноҳида сақласин», — деб ёзган у.

Аввалроқ Иордания ҳукумати «мамлакат барқарорлигига таҳдид» суриштируви доирасида қироллик собиқ валиаҳд шаҳзодаси ва яна 20 га яқин одамни ҳибсга олгани хабар берилган эди. Марҳум қирол Ҳусайн ва унинг тўртинчи рафиқасининг тўнғич ўғли шаҳзода Ҳамза ибн Ҳусайн Аммондаги ўз саройида уй қамоғига жойлаштирилган. Қироллик ҳукумати унинг ўз ўгай акаси қирол Абдулла II ни тахтдан ағдариш мақсадидаги эҳтимолий фитнасини текширмоқда. Петра ахборот агентлиги хабаридан ҳибсга олинган икки кишининг исми маълум бўлди, булар қироллик оиласининг собиқ аъзоси Шариф Ҳасан ибн Зайд ҳамда Қирол Абдулла II нинг собиқ маслаҳатчиси, собиқ молия вазири Басем Иброҳим Авадалладир.

Давлат тўнтаришига уриниш ҳақидаги хабарлар фонида АҚШ, БАА ва бошқа мамлакатлар Иордания қиролини қўллаб-қувватлашини маълум қилди.