Ривожланган мамлакатлар коронавирусга қарши вакциналарнинг 60 фоизини сотиб олган, бу эса бутун дунёда вакцина танқислигини келтириб чиқарди. Бу ҳақда Хитой ташқи ишлар вазири Ван И ўз интервьюсида айтиб ўтди, деб ёзади «РБК».
«Дунё аҳолисининг 16 фоизини ўз ичига олган бадавлат мамлакатлар вакциналарнинг 60 фоизини сотиб олган. Баъзи ривожланган мамлакатлар ўз аҳолисидан икки-уч баравар кўп миқдордаги препаратларга буюртма берган», — деди вазир.
Унинг фикрига кўра, бой мамлакатларнинг ҳаддан ортиқ хариди ривожланаётган мамлакатлар учун вакциналарни сотиб олишда муаммо келтириб чиқарган. «Кўпгина давлатларга ҳатто бир доза вакцинани топиш ҳам мушкул масала», — деди Хитой Ташқи ишлар вазирлиги раҳбари.
Ван И ушбу ҳолатни «вакцина миллатчилиги» деб атади ва унинг дунё бўйлаб тобора кенг тарқалаётганини таъкидлади.
Унинг қўшимча қилишича, Хитой 80 дан ортиқ мамлакат ва учта халқаро ташкилотга вакцина ишлаб чиқаришда ёрдам беради.
Аввалроқ Камбағаллик ва касалликларга қарши курашиш ташкилоти ONE Campaign ҳисоботида ривожланган давлатлар коронавирусга қарши вакциналарни ўз эҳтиёжларидан ортиқ ҳажмда сотиб олаётгани ҳақида айтиб ўтилганди. Таъкидланишича, февраль ойи охирига қадар АҚШ, Европа Иттифоқи, Австралия, Канада ва Япония 3 миллиард доза коронавирусга қарши вакцина сотиб олган, бу ушбу мамлакатлар аҳолисини эмлаш учун 1 миллиарддан ортиқ доза ҳисобланади.
Аввалроқ ЖССТ раҳбари Тедрос Гебрейесус фақат COVAX дастури ёрдамида дунё бўйлаб COVID-19’га қарши вакцинациянинг адолатли тақсимланишини амалга ошириш мумкинлигини таъкидлаган эди.
Маълумот учун, бунгача ЖССТ COVID-19’га қарши курашиш учун янги лойиҳани салкам 2 миллиард долларга баҳолаган эди. Режани тўлиқ молиялаштириш «глобал тикланиш учун сармоядир», деди Тедрос Гебрейесус.
Изоҳ (0)