Туркияда 10 нафар собиқ адмирал ҳукуматни танқид қилгани учун ҳибсга олинди

Туркияда ҳукуматни танқид қилган собиқ адмираллар (ҳарбий флотдаги олий унвон соҳиби) ҳибсга олинди, деб ёзади Reuters.

Анқара Бош прокуратураси истеъфодаги 10 нафар адмиралга нисбатан ҳибсга олиш ордери берилганини маълум қилди. Шунингдек, ҳуқуқни муҳофаза қилиш идораси яна 4 нафар гумонланувчига уч кун ичида ўз ихтиёри билан полицияга мурожаат қилишини буюриб, гумон қилинувчиларнинг ёши катта бўлгани сабабли уларни ҳибсга олмаслик тўғрисида қарор қабул қилди. Айни пайтда ҳибсга олинган 10 кишининг уйларида тинтув ўтказилмоқда. Уларнинг айбини исботлайдиган далиллар мусодара қилинади.

Собиқ адмиралларга қарши жиноий иш қўзғатишга 4 апрель куни 104 нафар собиқ ҳарбий хизматчи номидан келган хат асос бўлди. Хатда собиқ адмираллар Туркиянинг Монтрё конвенциясидан чиқиш эҳтимолидан хавотирдалиги баён қилинган.

1936 йилда имзоланган Монтрё конвенцияси мамлакатлар юк кемаларининг Босфор ва Дарданел бўғозларидан фойдаланишини тартибга солади. Бу Туркияга ўз чегараларидаги бўғозларни бошқариш ҳуқуқини беради ва уларга тинчлик даврида фуқаролик кемаларининг киришини кафолатлаб, ҳарбий-денгиз кемаларининг киришини чеклайди. Туркия Истанбулнинг шимолидаги Қора денгизни жанубдаги Мармара денгизи билан боғлайдиган улкан канал қуришни режалаштирмоқда, бу конвенция шартларига зиддир.

Прокуратура адмиралларнинг баёнотини Туркия жиноят кодексининг бузилиши деб топди ва уларни давлатнинг конституциявий тузуми ва хавфсизлигига путур етказувчи фитнада айблади. Туркия президентининг матбуот котиби Иброҳим Калиннинг айтишича, баёнотда ҳукуматни ағдаришга қаратилган ҳарбий фитна аломатлари мавжуд.

Аввалроқ Туркия Греция, Исроил ва Европа Иттифоқига норозилик нотасини юборган эди. Унда айтилишича, ушбу мамлакатлар томонидан EuroAsia Interconnector лойиҳаси доирасида яратилаётган электр тармоғи Туркиянинг сувли ҳудудларидан ўтади.Туркия ушбу давлатларнинг ҳар қандай хатти-ҳаракатлари фақат Анқаранинг розилиги билан амалга оширилиши кераклигини билдирган.