Шавкат Мирзиёев Эрон ташқи ишлар вазири Муҳаммад Жавод Зарифни қабул қилди

Ўзбекистон Президенти Шавкат Мирзиёев 5 апрель куни мамлакатда амалий ташриф билан бўлиб турган Эрон ташқи ишлар вазири Муҳаммад Жавод Зарифни қабул қилди.

Учрашувда Ўзбекистон билан Эрон ўртасидаги сиёсий, савдо-иқтисодий, инвестициявий, транспорт-логистика ва бошқа соҳалардаги ҳамкорликнинг бугунги аҳволи ва уларни ривожлантириш истиқболлари муҳокама қилинди.

Давлат раҳбари коронавирус пандемияси келтириб чиқарган мураккаб шароитларга қарамай Ўзбекистон–Эрон муносабатлари изчил ривожланиб бораётганини мамнуният билан қайд этди.

Вазир Муҳаммад Жавод Зариф, ўз навбатида, самимий қабул учун давлат раҳбарига миннатдорлик билдириб, Эрон президенти Ҳасан Руҳонийнинг саломи ва энг эзгу тилакларини етказди.

Учрашувда иқтисодий ҳамкорлик масалаларига, савдо алоқаларини ривожлантириш ва янги кооперация лойиҳаларини илгари суришга алоҳида эътибор қаратилди.

Транспорт-коммуникация соҳасидаги ҳамкорликни кенгайтириш, хусусан, Эроннинг денгиз портларидан самарали фойдаланиш ҳамда Ўзбекистон–Туркманистон–Эрон–Уммон транспорт йўлагини ривожлантириш муҳим экани таъкидланди.

Шунингдек, халқаро ва минтақавий сиёсатнинг томонларни қизиқтирган долзарб жиҳатлари, шу жумладан минтақавий хавфсизликни таъминлаш ва Афғонистонда тинчлик жараёнини илгари суриш масалалари муҳокама қилинди.

Эрон ташқи сиёсий идораси раҳбари Ўзбекистоннинг Афғонистон бўйича тинчлик музокараларига кўмаклашиш, ушбу мамлакатни минтақавий савдо-иқтисодий ҳамкорликка жалб этиш борасидаги саъй-ҳаракатларини юқори баҳолади.

Эслатиб ўтамиз, 5 апрель куни бўлиб ўтадиган Ўзбекистон—Эрон музокараларида сиёсий, савдо-иқтисодий, инвестициявий, транспорт-логистика ва бошқа соҳалардаги ўзаро муносабатларнинг ҳозирги ҳолати ва истиқболларини муҳокама қилиш режалаштирилган. Томонларни қизиқтирган минтақавий ва халқаро аҳамиятга молик масалалар юзасидан ҳам фикр алмашади.

Маълумот учун, 2017 йилнинг октябрида Абдулазиз Комилов ва Жавод Зариф Ўзбекистон ва Эрон ТИВлари ўртасидаги Ҳамкорлик дастурини имзолаган. 2018 йилнинг февралида Теҳронга амалга оширилган ташриф давомида Ўзбекистон ташқи ишлар вазири Эрон ТИВ раҳбари билан БМТ, ШҲТ ва бошқа халқаро ташкилотлар доирасида ҳамкорлик қилиш масалаларини муҳокама қилганди.