Ижтимоий тармоқларда 41 ёшли Б.А. гўёки Юнусобод тумани ИИО ФМБ 3-сонли ИИБга 2021 йилнинг 1 апрель куни келтирилганидан сўнг олган тан жароҳатлари туфайли вафот этганлиги ҳақида хабар тарқалмоқда. Ушбу хабарлар юзасидан Тошкент шаҳар Ички ичлар бош бошқармаси изоҳ берди.
Маълум қилинишича, ҳақиқатан 1 апрель куни соат 21:00 ларда муқаддам тўрт маротаба судланган Б.А. ва яна икки нафар фуқаро – муқаддам судланганлар, 1979 йилда туғилган Л.Д. ва 1970 йилда туғилган Л.А. билан сўров олиб боришлик учун Юнусобод тумани 3-сонли ИИБга келтирилган.
Ўртача ҳисобда 45 дақиқа давом этган сўровдан сўнг учала шахс қўйиб юборилган, шу жумладан, Б.А. ҳам. 2 апрель куни эрталаб соат 04:00–04:30 ларда 30-уйнинг олдида Б.А.нинг мурдаси топилган.
Ўлим сабабини аниқлаш мақсадида суд-тиббиёт экспертизаси тайинланган. Республика илмий-амалий суд-тиббиёт маркази ҳудудий филиали томонидан берилган бирламчи маълумотга кўра, марҳумнинг бир нечта касалликлари бўлган, хусусан, юрак ишемик касаллиги, гематоген сил, полиорган етишмовчилиги, икки томонлама ўпка плеврити, бош мия ва ўпка шиши, сурункали гепатит, гиёҳвандлик, алкоголдан заҳарланиш.
Мазкур ҳолат юзасидан Юнусобод тумани прокуратураси томонидан терговга қадар текширув ўтказилмоқда.
Бундан аввал Фарғонада ниқоб тақмаган йигитнинг ўлиги ИИБдан чиққани ҳақида миш-миш тарқалганди. Аслида у акасини кўргани кетаётганида вафот этган бўлиб чиқди. Шунингдек, ИИВ Оҳангаронда диний маъруза эшитган маҳбус калтакланганини рад этгани ҳақида хабар берилганди.
Изоҳ (0)