Ўзбекистон Олий судида 2020 йилнинг 30 октябрида бўлиб ўтган конференцияда Тошкент шаҳар маъмурий суди судьялари томонидан 5 мингга яқин сохта қарор чиқарилгани маълум қилинган эди. Бош прокуратура томонидан ушбу ходимларга нисбатан қўзғатилган жиноят иши доирасида тергов ҳаракатлари ўтказилаётгани билдирилган.
Судьялар олий кенгаши матбуот хизматининг 5 апрель куни маълум қилишича, жиноят ишлари бўйича Зангиота туман судида собиқ судьялар, суд ходимлари ва бошқа судланувчиларга нисбатан ҳукм ўқилди. Терговга таъсир этиши эҳтимолидан келиб чиқиб, ўша пайтда уларга изоҳ ёки муносабат билдириш мақсадга мувофиқ эмас, деб топилган.
Маълум қилинишича, жиноят иши доирасида 13 нафар шахс судланувчи сифатида жалб этилган бўлиб, уларнинг 3 нафари собиқ судья, 3 нафари собиқ судья ёрдамчилари, 7 нафари Тошкент шаҳар ИИББ ЙХҲБ собиқ ходимларидир.
Суд ҳукмига кўра, судланувчилар Жиноят кодексининг 167-моддаси 3-қисмининг «а,в» бандлари (жуда кўп миқдордаги ўзганинг мулкини уюшган гуруҳ томонидан ўзлаштириш ёки растрата йўли билан талон-торож қилиш), 209-моддаси 2-қисмининг «а,б» бандлари (мансаб сохтакорлиги) ва 227-моддаси 2-қисмининг «а» банди ( ўта муҳим аҳамиятга эга бўлган ҳужжатларни эгаллаш, нобуд қилиш, уларга шикаст етказиш ёки уларни яшириш) билан айбли деб топилди ва тегишли жазолар тайинланди.
Ҳукм чиқаришда дастлабки тергов даврида аниқланган 3 353 456 647 сўм зарардан 2 991 456 647 сўм қоплангани эътиборга олинган (аввал тарқатилган хабарларда зарар миқдори 8 миллиард сўмдан кўп эканига урғу берилган).
«Айни пайтда судланувчиларнинг шахси ва жиноят иши тафсилотлари очиқланиши мақсадга мувофиқ эмас. Чунки ҳукм қонуний кучга кирмаган. Қонуний кучга кирмаган ҳукм бўйича судланувчиларнинг шахси ва иш тафсилотларини очиқлаш айбсизлик презумпсияси тамойилига зид ҳисобланади. Ҳукмга нисбатан судланувчилар томонидан апеллация шикояти берилган», — дейилади хабарда.
Кенгаш матбуот хизмати ушбу собиқ судьялар фаолияти (жиноят иши қўзғатилишига қадар) ўрганилиб, йўл қўйган жиддий хато ва камчиликлари учун Судьялар олий кенгаши томонидан вазифасидан озод этилганини алоҳида қайд этган.
Изоҳ (0)