Германия президенти Франк-Валтер Штайнмайер аҳолини Пасха байрами билан табриклаб, чиқиш қилди ва уларни коронавирус пандемияси сабабли қатъий чоралар кўришга чақирди. Бу ҳақда «Интерфакс» хабар берди.
«Энди биз (коронавирус пандемияси) учинчи тўлқиннинг ўртасида турибмиз. Ва ҳозир уни енгиб ўтишимиз учун бор кучимизни сафарбар қилишимиз лозим. Келгуси ҳафталар янада жиддий чекловларни талаб қилади, буни сиз жуда ҳам яхши биласиз», — деди у.
Штайнмайернинг сўзларига кўра, пандемияни бартараф этиш учун кўп чоралар кўрилди, лекин «синовларда, вакцинацияда, рақамли ечимлар масаласида» хатоларга ҳам йўл қўйилди.
Аввалроқ Берлин ҳукумати коронавирус сабабли ижтимоий алоқаларда қўшимча ҳудудий чекловлар қўйишини маълум қилди: 2 апрелдан бошлаб 21:00 дан 05:00 гача кўчада икки кишидан ортиқ одам биргаликда тўпланмаслиги керак.
6 апрелдан бошлаб хонадонлардаги учрашувлар кўпи билан иккита оила иштирокида ўтказилиши мумкин, 21:00 дан 05:00 гача ҳар қандай ташрифлар тақиқланади.
31 мартдан бошлаб озиқ-овқат ва хўжалик маҳсулотлари дўконига фақат FFP2 респираторларида киришга рухсат берилди. Зарурий маҳсулотларни сотиб олишга кириш учун манфий коронавирус тести натижаларини тақдим этиш керак бўлади.
Маълумот учун, Германия канцлери Ангела Меркель мамлакатда карантин 18 апрелгача узайтирилганини маълум қилган эди.
Чеклов чораларини кучайтириш коронавируснинг тез тарқалаётгани билан боғлиқ. Ҳозир бир ҳафтада касалланиш 100 минг кишидан 100 дан ортиқ ҳолат аниқланмоқда.
Аввалроқ Штайнмайер AstraZeneca компаниясининг коронавирусга қарши вакцинасининг биринчи дозасини қабул қилгани ҳақида хабар берилганди. Вакцинация Бундесвер (мамлакат Қуролли Кучлари) шифохонасида ўтказилди.
«Мен Германияда ишлаб чиқарилган вакцинага ишонаман. Бугун AstraZeneca компанияси вакцинасининг биринчи дозасини олдим. Вакцинация бу пандемиядан қутулиш йўлидаги ҳал қилувчи қарор ҳисобланади», — деди 65 ёшли Штайнмайер.
Шу билан бирга, у мамлакат аҳолисини бу имкониятдан фойдаланишга ва вакцина олишга чақирди.
Изоҳ (0)