Germaniya prezidenti Frank-Valter Shtaynmayer aholini Pasxa bayrami bilan tabriklab, chiqish qildi va ularni koronavirus pandemiyasi sababli qat’iy choralar ko‘rishga chaqirdi. Bu haqda “Interfaks” xabar berdi.
“Endi biz (koronavirus pandemiyasi) uchinchi to‘lqinning o‘rtasida turibmiz. Va hozir uni yengib o‘tishimiz uchun bor kuchimizni safarbar qilishimiz lozim. Kelgusi haftalar yanada jiddiy cheklovlarni talab qiladi, buni siz juda ham yaxshi bilasiz”, — dedi u.
Shtaynmayerning so‘zlariga ko‘ra, pandemiyani bartaraf etish uchun ko‘p choralar ko‘rildi, lekin “sinovlarda, vaksinatsiyada, raqamli yechimlar masalasida” xatolarga ham yo‘l qo‘yildi.
Avvalroq Berlin hukumati koronavirus sababli ijtimoiy aloqalarda qo‘shimcha hududiy cheklovlar qo‘yishini ma’lum qildi: 2-apreldan boshlab 21:00 dan 05:00 gacha ko‘chada ikki kishidan ortiq odam birgalikda to‘planmasligi kerak.
6-apreldan boshlab xonadonlardagi uchrashuvlar ko‘pi bilan ikkita oila ishtirokida o‘tkazilishi mumkin, 21:00 dan 05:00 gacha har qanday tashriflar taqiqlanadi.
31-martdan boshlab oziq-ovqat va xo‘jalik mahsulotlari do‘koniga faqat FFP2 respiratorlarida kirishga ruxsat berildi. Zaruriy mahsulotlarni sotib olishga kirish uchun manfiy koronavirus testi natijalarini taqdim etish kerak bo‘ladi.
Ma’lumot uchun, Germaniya kansleri Angela Merkel mamlakatda karantin 18-aprelgacha uzaytirilganini ma’lum qilgan edi.
Cheklov choralarini kuchaytirish koronavirusning tez tarqalayotgani bilan bog‘liq. Hozir bir haftada kasallanish 100 ming kishidan 100 dan ortiq holat aniqlanmoqda.
Avvalroq Shtaynmayer AstraZeneca kompaniyasining koronavirusga qarshi vaksinasining birinchi dozasini qabul qilgani haqida xabar berilgandi. Vaksinatsiya Bundesver (mamlakat Qurolli Kuchlari) shifoxonasida o‘tkazildi.
“Men Germaniyada ishlab chiqarilgan vaksinaga ishonaman. Bugun AstraZeneca kompaniyasi vaksinasining birinchi dozasini oldim. Vaksinatsiya bu pandemiyadan qutulish yo‘lidagi hal qiluvchi qaror hisoblanadi”, — dedi 65 yoshli Shtaynmayer.
Shu bilan birga, u mamlakat aholisini bu imkoniyatdan foydalanishga va vaksina olishga chaqirdi.
Izoh (0)