Интернетда Жанубий Калифорниядаги уйлардан бирига ноёб мотоцикллар коллекциясини томоша қилиш учун келиб, у ерда 1955 йилги қизил Porsche 550 Spyder’га дуч келган эркакнинг видеоси пайдо бўлди, деб хабар беради Motor.
Топилмага Роберт Грин исмли америкалик дуч келган. Эркак ноёб мотоцикллар коллекцияси билан танилган. Янги нусхаларни топиш илинжида у Жанубий Калифорнияга отланган ва унинг эътиборини қурилиш контейнери тортган. Уни очган эркак ўз кўзларига ишонмаган. Контейнер ичида 1955 йилги қизил Porsche 550 Spyder 35 йилдан буён ҳаракатсиз турган.
Икки ўриндиқли спорткар 69-сериядан. Ишлаб чиқаришнинг уч йили давомида немис компанияси Porsche 550 Spyder’нинг жами 90 нусхасини йиғган. Porsche’нинг биринчи эгаси гавайилик аёл бўлиб, у автомобилдан ҳаваскорлик пойгаларида фойдаланган. 1963 йилда ноёб моделни икки минг доллар эвазига Лес Ганнерсон исмли эркак сотиб олган ва 1980 йилларда машинани тўлиқ реставрация қилган. Шундан сўнг у мотоцикллар коллекциясига қизиқиб қолган, Porsche эса юк контейнеридан ўрин олган.
Узоқ йиллар давомида бир жойда турган Porsche 550 Spyder ажойиб ҳолатда сақланган. Спорткар кузовида занглаш аломатлари йўқ. Автомобиль 135 от кучига эга 1,5 литрли оригинал двигатель ёрдамида ҳаракатга келади. Агрегат беш поғонали механик узатмалар қутиси ёрдамида бошқарилади. Орқа узатмали спорткарнинг максимал тезлиги соатига 220 километрни ташкил этади.
Роберт Грин ушбу Porsche’ни «аср топилмаси» дея таърифлаган. Унинг сўзларига кўра, эксклюзив спорткар ҳозирда ўзига янги хўжайин топган. Коллексионер харид қанчага амалга оширилганини ошкор этмаган, бироқ бу каби моделлар аукционларда бир неча миллион доллар туради.
Мавзуга доир:
Изоҳ (0)