«Loopnet.com» сайтида Американинг Falcon Motorsport суперкарлар ишлаб чиқарувчи компанияси сотувга қўйилгани тўғрисида эълон пайдо бўлди. Компания барча муаллифлик ҳуқуқлари, ихтиролари ва ҳатто бир дона йиғилган Falcon F7 суперкари билан 675 минг долларга сотилмоқда, деб хабар беради Motor.
Falcon Motorsport компаниясига 2009 йили Мичиган штатидаги Холли шаҳрида автомобиль дизайнери ва муҳандис Жефф Лемке томонидан асос солинган. У Ferrari’га рақобат туғдира оладиган «миллий суперкар»ни яратишни режалаштирган ва 2012 йилда марканинг биринчи модели — Falcon F7 тақдим этилган. Шундан буён Falcon жами еттита машинани чиқарган.
Эълонда таъкидланишича, компаниянинг бўлажак эгасига барча асбоб-анжомлар, пресс-шакллар, материаллар ва бошқа предметлар рўйхати, логотиплар, шиорлар, товар белгилари, муаллифлик ҳуқуқи, ноу-хау, тижорат сирлари, формулалар, ихтиролар, техник маълумотлар, электрон маълумотлар базаси ва чизмалар тақдим этилади. Ҳатто Falcon суперкарларини ишлаб чиқариш учун лицензия ҳам мавжуд.
Falcon F7 суперкарларнинг ҳар бири 250 минг доллар туриши инобатга олинса, юқорида келтирилган нарх жуда арзон. Тахминларга кўра, эълон нотўғри берилган, гап марканинг савдоси ҳақида эмас, балки Falcon Motorsпортънинг тижорий кўчмас мулки — бино ва қурилмалари ҳақида кетмоқда.
Falcon F7 моделига 1100 от кучини тақдим этишга қодир 7,0 литрли Chevrolet мотори ўрнатилган. Машина соатига 100 километр тезликка уч сониядан камроқ вақт ичида эришади. 2014 йилда ишлаб чиқарилган мавжуд нусхалардан бири шу йилнинг мартида 75 минг долларга сотилган эди.
Изоҳ (0)