«10 минг нафар тор доирадаги мутахассислар бизда етишмайди». Шавкат Мирзиёев келгуси ўқув йилидан клиник ординатуранинг қабул квотасини икки баробар оширишга топшириқ берди

Президент Шавкат Мирзиёев раислигида соғлиқни сақлаш тизимини тубдан ислоҳ қилиш бўйича видеоселектор йиғилиши бўлиб ўтди. Йиғилишда тор доирадаги мутахассис шифокорлар етишмаслиги масаласи кўрилди.

«10 минг нафар тор доирадаги мутахассислар бизда етишмайди. Масалан, Сурхондарёда 130 та тез тиббий ёрдам, 60 та терапевт шифокори, Тошкент вилоятида 112 та лаборант, Фарғонада 100 та болалар шифокори, Наманганда 25 та акушер етишмайди.

Амалдаги тизим бўйича йилига 3000 нафар мутахассис тайёрланса-да, ҳар йили 2000 нафар мутахассис пенсияга чиқиб кетади. Шу сабабли Тўйчиев, Хожибоев клиник ординатура ўқитишнинг янги тизимини жорий этиб, келгуси ўқув йилидан қабул квотасини икки баробар ошириш таклифини бериши керак.

Ушбу янги тизимда ординаторлар ўқув жараёнини ярмини олийгоҳларда, қолган ярмини эса иш жойида давом эттиради.

Вилоят ҳокимлари тор доирадаги мутахассис шифокорларни тайёрлаш учун маҳаллий бюджетдан грант ажратиши шарт. Масалан, ушбу грант асосида ўқиган шифокор грант ажратган вилоятга бориб, камида 3 йил ишлаб бериш мажбуриятини олиши зарур», – дейди Шавкат Мирзиёев.

Бундан аввал Шавкат Мирзиёев апрель—июнь ойларида 4 миллион аҳолини эмлаш зарурлигини ҳамда вилоятларда дориларнинг 3-6 ойлик захираси бўлиши кераклигини таъкидлаганди.