Президент Шавкат Мирзиёев раислигида соғлиқни сақлаш тизимини тубдан ислоҳ қилиш бўйича ўтказилаётган видеоселектор йиғилиши бўлиб ўтди. Унда Президент тиббиётдаги аҳвол жуда оғир экани, соҳа бўйича қабул қилинган фармон ва қарорлар бажарилмасдан қоғозда қолиб кетаётгани таъкидлади. Бу ҳақда ЎзА хабар қилди.
«Одамлар тиббий хизмат сифатидан норози. Соҳада ‘темир дафтар’, ‘аёллар дафтари’ ва ‘ёшлар дафтари’ каби масалаларни ичига кириб, мунтазам шуғулланмасак, ислоҳотлар натижасини халқимиз сезмайди.
Пандемия бизга шуни ўргатди: ҳар бир вилоятда дори-дармонларнинг нархи ошиб кетмаслиги учун ўзининг 3-6 ойлик захираси бўлиши керак», — деди Президент.
Селектор давомида фармон ва қарорлар ижросини охирига етказиш бўйича ҳудудларга масъуллар бириктирилиши таъкидланди. Йиғилишда вилоят, туман ва шаҳар ҳокимлари, ҳудудий тиббиёт бўлинмалари раҳбарлари бир ҳафта муддатда апрель ойида ва йил якунигача қиладиган ишлари бўйича «йўл харитаси»ни ишлаб чиқиб, аниқ режалари билан халққа мурожаат қилиши ва тизимда ўзгариш қилишга ваъда бериши айтилди.
Қайд этилишича, 2 апрелдан бошлаб қуйидаги раҳбарлар ҳудудларда қабул қилинган фармон ва қарорлар ижросини охирига етказишга шахсан масъул бўлади:
- бош вазир ўринбосари Б.Мусаев — Сурхондарё, Қашқадарё, Бухоро вилоятларига;
- соғлиқни сақлаш вазири А.Ҳожибоев — Тошкент вилояти ва Тошкент шаҳрига;
- вазирнинг биринчи ўринбосари А.Иноятов — Қорақалпоғистон Республикаси, Хоразм, Навоий вилоятларига;
- вазир ўринбосари Э.Боситханова — Андижон, Наманган, Фарғона вилоятларига;
- Санитария-эпидемиологик осойишталик ва жамоат саломатлиги хизмати раҳбари Б.Юсупалиев — Жиззах ва Навоий вилоятларига;
- вазир ўринбосари А.Азизов — Самарқанд, Сирдарё вилоятларига бириктирилди.
Бунда, қишлоқ ва маҳаллаларда тиббиёт бригадаларини ташкил этиб, тиббий хариталарни шакллантириш, аҳолини 4 та хавф гуруҳига ажратиб, манзилли кўрикдан ўтказиш ва даволаш ишларини ташкил қилиш зарурлиги қайд этилди.
Изоҳ (0)