Prezident Shavkat Mirziyoyev raisligida sog‘liqni saqlash tizimini tubdan isloh qilish bo‘yicha o‘tkazilayotgan videoselektor yig‘ilishi bo‘lib o‘tdi. Unda Prezident tibbiyotdagi ahvol juda og‘ir ekani, soha bo‘yicha qabul qilingan farmon va qarorlar bajarilmasdan qog‘ozda qolib ketayotgani ta’kidladi. Bu haqda O‘zA xabar qildi.

“Odamlar tibbiy xizmat sifatidan norozi. Sohada ‘temir daftar’, ‘ayollar daftari’ va ‘yoshlar daftari’ kabi masalalarni ichiga kirib, muntazam shug‘ullanmasak, islohotlar natijasini xalqimiz sezmaydi.

Pandemiya bizga shuni o‘rgatdi: har bir viloyatda dori-darmonlarning narxi oshib ketmasligi uchun o‘zining 3-6 oylik zaxirasi bo‘lishi kerak”, — dedi Prezident.

Selektor davomida farmon va qarorlar ijrosini oxiriga yetkazish bo‘yicha hududlarga mas’ullar biriktirilishi ta’kidlandi. Yig‘ilishda viloyat, tuman va shahar hokimlari, hududiy tibbiyot bo‘linmalari rahbarlari bir hafta muddatda aprel oyida va yil yakunigacha qiladigan ishlari bo‘yicha “yo‘l xaritasi”ni ishlab chiqib, aniq rejalari bilan xalqqa murojaat qilishi va tizimda o‘zgarish qilishga va’da berishi aytildi.

Qayd etilishicha, 2-apreldan boshlab quyidagi rahbarlar hududlarda qabul qilingan farmon va qarorlar ijrosini oxiriga yetkazishga shaxsan mas’ul bo‘ladi:

  • bosh vazir o‘rinbosari B.Musayev — Surxondaryo, Qashqadaryo, Buxoro viloyatlariga;
  • sog‘liqni saqlash vaziri A.Hojiboyev — Toshkent viloyati va Toshkent shahriga;
  • vazirning birinchi o‘rinbosari A.Inoyatov — Qoraqalpog‘iston Respublikasi, Xorazm, Navoiy viloyatlariga;
  • vazir o‘rinbosari E.Bositxanova — Andijon, Namangan, Farg‘ona viloyatlariga;
  • Sanitariya-epidemiologik osoyishtalik va jamoat salomatligi xizmati rahbari B.Yusupaliyev — Jizzax va Navoiy viloyatlariga;
  • vazir o‘rinbosari A.Azizov — Samarqand, Sirdaryo viloyatlariga biriktirildi.

Ushbu rahbarlar viloyat, tuman va shahar hokimlari bilan birga 1-mayga qadar Sirdaryo viloyati hamda 26 ta tuman va shahar tajribasini respublikaning barcha hududlarida boshlash kerakligi ta’kidlandi.

Bunda, qishloq va mahallalarda tibbiyot brigadalarini tashkil etib, tibbiy xaritalarni shakllantirish, aholini 4 ta xavf guruhiga ajratib, manzilli ko‘rikdan o‘tkazish va davolash ishlarini tashkil qilish zarurligi qayd etildi.