Аввал хабар берилганидек, Ўзбекистон Президентининг Кўксарой қароргоҳида 30 март куни Венгрия бош вазири Виктор Орбанни расмий кутиб олиш маросими бўлиб ўтди. Маросимдан аввал президент Шавкат Мирзиёев ва унинг рафиқаси Зироатхон Мирзиёева Венгрия бош вазири Виктор Орбан ва унинг турмуш ўртоғи Анико Леваи билан бирга эсдалик учун суратга тушди.
Шундан сўнг расмий маросимдан кейин ташкил этилган тор доирадаги учрашувда Президент Шавкат Мирзиёев меҳмонни Ўзбекистонга ташрифи билан қутлаб, бу икки давлат ўртасидаги алоқаларда янги даврни бошлаб беришини таъкидлаган. Ўз навбатида, Виктор Орбан ташрифидан мамнунлигини билдириб, Венгрия Ўзбекистон билан ҳамкорликни кенгайтиришдан манфаатдор эканини қайд этган.
Расмий музокаралар икки мамлакат расмий делегациялари иштирокида давом эттирилди. Тадбирда икки томонлама ҳамкорлик борасида ҳали ишга солинмаган жуда катта имкониятлар борлиги таъкидланган. Шу сабабли асосий эътибор савдо-иқтисодий, инвестициявий ва молиявий алоқаларни янада ривожлантириш масалаларига қаратилган. Шавкат Мирзиёев мамлакатлар ўртасидаги товар айирбошлашни кўпайтириш, савдо ҳажми мувозанатини тенглаштириш, зарур маҳсулотларни ўзаро етказиб беришни кўпайтириш муҳимлигини таъкидлади. Бу борада Будапештда ташкил этилаётган Ўзбекистон—Венгрия савдо уйи имкониятларидан самарали фойдаланиш зарурлиги қайд этилди. Давлат раҳбари икки мамлакат ҳудудлари ўртасида шериклик алоқаларини ўрнатиш, ҳар йили Минтақалар форумини ўтказиш таклифини билдирди.
Венгрия қишлоқ хўжалиги, меваларни сақлаш ва қайта ишлаш, балиқчилик ҳамда уруғчилик соҳаларидаги илғор тажриба ва технологиялар билан алмашишга тайёрлигини билдирди.
Учрашувда маданий-гуманитар соҳалардаги ҳамкорликни ривожлантириш масалаларига ҳам катта эътибор қаратилди.
Таъкидлаш керакки, ташриф доирасида кўп қиррали шерикликни кенгайтиришга қаратилган 10 дан ортиқ ҳужжат имзоланди. Расмий тадбирлар якунида Кўксарой қароргоҳининг анжуманлар залида ана шу ҳужжатларни алмашиш маросими ҳамда оммавий ахборот воситалари вакиллари билан учрашув ташкил этилди.
«Дарё» мухбири ушбу тадбирларнинг айримларида кадрларга муҳрланган лаҳзаларни улашди.
Изоҳ (0)