Tesla маркасининг капитализацияси 605 миллиард долларга етиб, дунёдаги энг қиммат автомобиль компаниясига айланди. Таққослаш учун, иккинчи ўринда бўлган Toyota’нинг қиймати ундан 2,5 бараварга кам — 244,1 миллиард доллар, деб хабар беради Motor.
Иккинчи ўринда 153,2 миллиард доллар кўрсаткич билан Volkswagen жойлашган. Дунёдаги энг қиммат автомобиллар топ-5 лигидан, шунингдек, Daimler (90,8 миллиард доллар) ва General Motors (80,4 миллиард доллар) ўрин олган. Олтинчи поғонани 68 миллиард доллар капитализация билан Хитойнинг BYD компанияси банд этган — бу бутун Хитойдаги автомобиль ишлаб чиқарувчилар орасидаги энг йирик кўрсаткич.
Шу билан бирга, даромадлар ҳажми таққосланадиган бўлса, Tesla биринчи ўринда эмас, у ҳатто дастлабки ўнта поғонага ҳам кира олмайди. Америка маркаси 2020 йилда 31,5 миллиард доллар даромад кўриб, 14-ўринни эгаллаган. Бироқ Tesla даромадларининг сўнгги уч йилдаги ўртача ўсиши 21,4 фоизга тенг.
Ўтган йили энг кўп даромад кўрган компаниялар қаторидан Volkswagen ва Toyota ўрин олган. Улар мос равишда 254 ҳамда 249,4 миллиард доллар ишлаб топган. Улардан кейинги поғонада Daimler (175,9 миллиард доллар), Форд (127,1 миллиард доллар) ва GM (122,5 миллиард доллар) жойлашган.
Аввалроқ Илон Маск Tesla автомобилларини биткоинга сотиш бошланганини эълон қилганди.
Изоҳ (0)