Дунёдаги энг арзон машиналар рўйхати тузилди. Ундан Chevrolet Spark ҳам ўрин олган

Канаданинг HotCars нашри дунёдаги энг арзон машиналар рўйхатини тузиб чиқди. Ундан саккизта енгил машина ўрин олган бўлиб, улар ихчамлиги, оддий жиҳозланганлиги, моторининг кучсизлиги ва моделни бозорга чиқариш учун керак бўладиган базавий хавфсизлик даражасига эга эканлиги билан ажралиб туради, деб ёзади Motor. Рўйхатдан General Motors’нинг Spark модели ҳам ўрин олган.

Нашр томонидан танланган моделлар орасида Хитой ва Ҳиндистондан ташқари, Европа ва АҚШда ишлаб чиқарилган машиналар ҳам ўрин олган. Рўйхатдаги энг қиммат автомобиль Mitsubishi Miragi ҳисобланади — 14 990 доллар. Рўйхатни тузганларнинг таъкидлашича, япон хетчбеки оддий ҳайдовчилар учун, автомобилни А пунктидан Б пунктига етиб олишда фойдаланиладиган транспорт сифатида қарайдиганлар учун мўлжалланган.

Еттинчи ўрин икки ўриндиқли Smart ForTwo’га насиб этган — Европадаги энг арзон автомобиль (14 650 доллар). Францияда заводда ишлаб чиқарилиб, дунёнинг 46 мамлакатида сотилаётган ушбу орқа учатмали кичкина хетчбекдан Европанинг тор кўчаларида фойдаланиш қулай.

Рўйхатнинг олтинчи поғонаси 2002 йилда General Motors сотиб олгунига қадар Daewoo маркаси остида ишлаб чиқарилган 14 400 долларли Chevrolet Spark’ка насиб этди. Spark АҚШ бозоридаги энг арзон янги машина эганлигига қарамай, у Ҳиндистондаги энг арзон машинадан тўрт баробар қиммат.

Рўйхатдаги навбатдаги ўрин Руминиянинг Dacia Sandero моделига насиб этган — Буюк Британиядаги энг ҳамёнбоп автомобилнинг қиймати 8300 долларни ташкил этади. Автомобиль 2007 йилда конвейердан чиққан ва ҳозирга қадар уч авлод ўзгарган.

Тўртинчи поғонада Россиянинг Lada Granta’си жойлашди — 6,7 минг доллар. Канадаликларнинг таъкидлашича, Lada сифатининг ёмонлиги ва хавфсизлик даражасининг пастлиги билан танилган.

Учинчи поғондан рейтингдаги ягона электрокар — Hong Guang Mini EV ўрин олган бўлиб, у Хитойдаги «яшил» автомобиллар орасида машҳурлик бўйича Tesla Модель 3’дан кейин туради. Кичкина автомобиль 2020 йилнинг ёзида тақдим этилган, 2021 йилнинг январида эса унинг 160 минг нусхаси сотилган. Машина нархи 4400 доллар.

Maruti Suzuki Alto 4100 долларлик кўрсаткич билан иккинчи ўринни эгаллаган. Тўрт эшикли хетчбэк Ҳиндистондаги энг арзон ва энг кўп сотиладиган моделлардан бири ҳисобланади.

Рўйхатдаги энг арзон модель 2015 йилда Ҳиндистон бозори учун махсус яратилган Renault Kwid бўлди. Уни 3900 долларга харид қилиш мумкин.