Сувайш канали орқали икки йўналишда ҳам кемалар ҳаракати 29 март, душанба оқшомидан қайта тикланди. Бу ҳақда канал маъмуриятига таяниб, «РБК» хабар берди.
Хабарга кўра, Сувайш канали яқинида тўпланиб қолган кемаларнинг 110 дан ортиғини 30 март, сешанба куни эрталабгача ўтказиб юбориш режалаштирилган.
«Кема ҳалокатида каналнинг айби йўқ. Ҳодиса юзасидан ўтказилган текширувда ким товон тўлаши кераклиги аниқланади», — деди канал маъмурияти раҳбари Усама Раби.
Сувайш канали маъмуриятининг яна бир раҳбари, Миср президенти маслаҳатчиси Мохаб Мамиш каналнинг тўсилиб қолишида Ever Given кемаси капитанини айбдор деб атади. Унинг сўзларига кўра, кучли шамол туфайли экипаж кемани бошқара олмагани учун кема орқага бурилиб, канални тўсиб қўйган. Маъмурият вакили, шунингдек, воқеада Сувайш канали раҳбариятининг айбини инкор этди.
Reuters’нинг Миср телевидениесига асосланиб, хабар беришича, ҳозирда камида 400 та кема каналдан ўтиш учун навбат кутмоқда. Улар орасида ўнлаб контейнер кемалари, нефть танкерлари ва суюлтирилган газ ташувчи кемалар бор.
Аввалроқ Миср президенти Абдул-Фаттоҳ ас-Сиси Ever Given кемасининг саёзликка тиқилиб қолиши оқибатида тўсиб қўйилган Сувайш каналини блокдан чиқариш ишлари муваффақиятли якунланганини эълон қилган эди. Ever Given кемаси саёзликдан чиқарилган.
Эслатиб ўтамиз, 23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемадан иборат тирбандлик юзага келган эди, деб ёзади Bloomberg.
Кема ушбу канал орқали ҳаракатни бутунлай тўхтатиб қўйганди. Дастлаб кемалар қатнайдиган йўлни очишга икки-уч кун кетиши тахмин қилинган эди. Аммо Ever Given’ни саёзликдан чиқариб олишга уринаётган Boskalis компанияси раҳбари Питер Бердовски бунга ҳафталаб вақт кетиши мумкинлигини айтганди.
Кейинроқ Ever Given контейнер ташувчи кемаси атрофидаги сув тубини қазиш ишлари бошланди. Кема 26 март куни кечқурун ўз жойидан бироз силжитилди.
Кемалар қатнови бўйича Lloyd’s List компанияси ҳисоб-китобларига кўра, Сувайш каналида саёзликка тиқилиб қолган Ever Given контейнер ташувчи кемаси томонидан кемалар йўлининг тўсиб қўйилиши жаҳон савдосига соатига 400 миллион долларга тушаётган эди. Мисрнинг Ever Given билан боғлиқ вазиятдан кўраётган талафоти кунига 14 миллион долларга баҳоланган.
Изоҳ (0)