Ўзбекистон Президентининг Кўксарой қароргоҳида 30 март куни Венгрия бош вазири Виктор Орбанни расмий кутиб олиш маросими бўлиб ўтди. Президент матбуот хизматининг маълум қилишича, Ўзбекистон ва Венгрия етакчиларининг мулоқоти аввал тор доирада бўлиб ўтган.
Президент Шавкат Мирзиёев меҳмонни Ўзбекистонга ташрифи билан қутлаб, бу икки давлат ўртасидаги алоқаларда янги даврни бошлаб беришини таъкидлаган. Ўз навбатида Виктор Орбан ташрифидан мамнунлигини билдириб, Венгрия Ўзбекистон билан ҳамкорликни кенгайтиришдан манфаатдор эканини қайд этган.
Маълум қилинишича, музокарада сиёсий, савдо-иқтисодий, инвестициявий, молиявий-техник ва маданий-гуманитар соҳалардаги ҳамкорликни ривожлантириш истиқболлари муҳокама қилинган.
Томонлар Ўзбекистон—Венгрия муносабатларини ўзаро ишонч ва кенг доирадаги умумий манфаатларга асосланган стратегик шериклик даражасига кўтаришга тайёр эканини тасдиқлаган. Узоқ муддатли ҳамкорликни мустаҳкамлаш, ўзаро манфаатли янги соҳаларни ишга солиш, ишбилармон доиралар ва ҳудудлар ўртасидаги алоқаларни қўллаб-қувватлашга келишиб олинган.
Томонларни қизиқтирган халқаро ва минтақавий масалалар юзасидан фикр алмашилган. Тинчлик, хавфсизлик ва барқарорликни мустаҳкамлаш бўйича қарашлар ва ёндашувлар умумий экани тасдиқланган.
Аввалроқ Венгрия бош вазири Виктор Орбан Ўзбекистонга илк расмий ташрифини Мустақиллик майдонидан бошлагани, олий мартабали меҳмон Мустақиллик ва эзгулик монументи пойига гул қўйгани тўғрисдиа хабар берилганди.
Изоҳ (0)