Россия Соғлиқни сақлаш вазирлигига «Спутник Лайт» вакцинасини рўйхатдан ўтказиш учун ариза топширилди. Бу ҳақда дори воситалари давлат реестрининг сайтига таяниб «ТАСС» хабар берди.
Соғлиқни сақлаш вазири ёрдамчиси Алексей Кузнецовнинг журналистларга хабар беришича, «Спутник Лайт» вакцинасини рўйхатдан ўтказиш учун Соғлиқни сақлаш вазирлигига досье келиб тушган. «Тез орада Россия Соғлиқни сақлаш вазирлиги қошидаги мутахассислар ташкилоти унинг сифатини, хавфсизлигини ва самарадорлигини экспертизадан ўтказади, шундан кейин тегишли қарор қабул қилинади», — деди у.
Россия 2020 йилнинг 11 август куни «Спутник V» деб номланган дунёдаги биринчи коронавирусга қарши вакцинани рўйхатдан ўтказди. Препарат Россиянинг тўғридан-тўғри инвестициялар жамғармаси (РФПИ) ва Гамалея номидаги Эпидемиология ва микробиология миллий тадқиқот маркази томонидан ҳамкорликда ишлаб чиқилган. «Спутник V» таркибида инсон аденовируси мавжуд бўлган векторли вакцина ҳисобланади.
«Спутник Лайт» эса «Спутник V» вакцинасининг енгилроқ кўриниши бўлиб, у фақат бир компонентдан иборат ва фақат бир дозада қабул қилинади. 2021 йилнинг 27 февраль куни Москвада вакцина устида тадқиқот олиб бораётганларни эмлаш бошланди.
Маълумот учун, Россия Соғлиқни сақлаш вазирлиги коронавирусга қарши «Спутник V» вакцинасининг корхонада белгиланган максимал баҳосини икки бараварга пасайтиргани ҳақида хабар берилди. Илгари вакцинанинг иккита компоненти нархи 1942 рубль (278 743,80 сўм)ни ташкил қилган бўлса, эндиликда у 866 рубль 81 копейка (124 474,46 сўм) этиб белгиланди.
Шунингдек, Россиянинг коронавирусга қарши «Спутник V» вакцинаси ҳам «классик» COVID-19’га, ҳам коронавируснинг «британча» турига қарши бир хил самара кўрсатди. Унинг сўзларига кўра, Соғлиқни сақлаш вазирлиги мутахассислари томонидан «Спутник V» билан эмланган кўнгиллилар қон зардобининг «британча» штаммга нисбатан нейтраллаштирувчи (зарарсизлантирувчи) фаоллиги тадқиқ қилинган. Ушбу штаммни зарарсизлантирувчи антитаналарнинг даражаси «асл SARS-CoV-2 штаммига қарши антитаналар даражасидан сезиларли даражада фарқ қилмайди».
Аввалроқ Россия ва Хитойнинг COVID-19’га қарши вакциналар етказиб бериш соҳасидаги ҳаракатлари туфайли Европа янги турдаги жаҳон урушига дуч келди, деб таъкидлади Франция президенти Эммануэль Макрон. Унинг фикрига кўра, Европа мамлакатлари вакциналар масаласида бошқаларга қарам бўлмаслик учун зарур чораларни кўриши керак.
Франция Ташқи ишлар вазирлигининг Европа ишлари бўйича давлат котиби Клеман Боннинг таъкидлашича, Франция июнь ойида Россиянинг «Спутник V» коронавирусга қарши вакцинасини қўллаши мумкинлигини истисно қилмайди. Бунинг учун препарат Европа Дори-дармон воситалари агентлигининг текширувидан ўтиши керак.
Изоҳ (0)