Rossiya Sog‘liqni saqlash vazirligiga “Sputnik Layt” vaksinasini ro‘yxatdan o‘tkazish uchun ariza topshirildi. Bu haqda dori vositalari davlat reyestrining saytiga tayanib “TASS” xabar berdi.
Sog‘liqni saqlash vaziri yordamchisi Aleksey Kuznetsovning jurnalistlarga xabar berishicha, “Sputnik Layt” vaksinasini ro‘yxatdan o‘tkazish uchun Sog‘liqni saqlash vazirligiga dosye kelib tushgan. “Tez orada Rossiya Sog‘liqni saqlash vazirligi qoshidagi mutaxassislar tashkiloti uning sifatini, xavfsizligini va samaradorligini ekspertizadan o‘tkazadi, shundan keyin tegishli qaror qabul qilinadi”, — dedi u.
Rossiya 2020-yilning 11-avgust kuni “Sputnik V” deb nomlangan dunyodagi birinchi koronavirusga qarshi vaksinani ro‘yxatdan o‘tkazdi. Preparat Rossiyaning to‘g‘ridan to‘g‘ri investitsiyalar jamg‘armasi (RFPI) va Gamaleya nomidagi Epidemiologiya va mikrobiologiya milliy tadqiqot markazi tomonidan hamkorlikda ishlab chiqilgan. “Sputnik V” tarkibida inson adenovirusi mavjud bo‘lgan vektorli vaksina hisoblanadi.
“Sputnik Layt” esa “Sputnik V” vaksinasining yengilroq ko‘rinishi bo‘lib, u faqat bir komponentdan iborat va faqat bir dozada qabul qilinadi. 2021-yilning 27-fevral kuni Moskvada vaksina ustida tadqiqot olib borayotganlarni emlash boshlandi.
Ma’lumot uchun, Rossiya Sog‘liqni saqlash vazirligi koronavirusga qarshi “Sputnik V” vaksinasining korxonada belgilangan maksimal bahosini ikki baravarga pasaytirgani haqida xabar berildi. Ilgari vaksinaning ikkita komponenti narxi 1942 rubl (278 743,80 so‘m)ni tashkil qilgan bo‘lsa, endilikda u 866 rubl 81 kopeyka (124 474,46 so‘m) etib belgilandi.
Shuningdek, Rossiyaning koronavirusga qarshi “Sputnik V” vaksinasi ham “klassik” COVID-19’ga, ham koronavirusning “britancha” turiga qarshi bir xil samara ko‘rsatdi. Uning so‘zlariga ko‘ra, Sog‘liqni saqlash vazirligi mutaxassislari tomonidan “Sputnik V” bilan emlangan ko‘ngillilar qon zardobining “britancha” shtammga nisbatan neytrallashtiruvchi (zararsizlantiruvchi) faolligi tadqiq qilingan. Ushbu shtammni zararsizlantiruvchi antitanalarning darajasi “asl SARS-CoV-2 shtammiga qarshi antitanalar darajasidan sezilarli darajada farq qilmaydi”.
Avvalroq Rossiya va Xitoyning COVID-19’ga qarshi vaksinalar yetkazib berish sohasidagi harakatlari tufayli Yevropa yangi turdagi jahon urushiga duch keldi, deb ta’kidladi Fransiya prezidenti Emmanuel Makron. Uning fikriga ko‘ra, Yevropa mamlakatlari vaksinalar masalasida boshqalarga qaram bo‘lmaslik uchun zarur choralarni ko‘rishi kerak.
Fransiya Tashqi ishlar vazirligining Yevropa ishlari bo‘yicha davlat kotibi Kleman Bonning ta’kidlashicha, Fransiya iyun oyida Rossiyaning “Sputnik V” koronavirusga qarshi vaksinasini qo‘llashi mumkinligini istisno qilmaydi. Buning uchun preparat Yevropa Dori-darmon vositalari agentligining tekshiruvidan o‘tishi kerak.
Izoh (0)