Farg‘ona viloyati Toshloq tumanida o‘zganing pulini o‘zlashtirgan voyaga yetmagan shaxsga nisbatan hukm o‘qildi, deya xabar bermoqda O‘zA.
Qayd etilishicha, Jinoyat ishlari bo‘yicha Toshloq tuman sudi tomonidan Jinoyat kodeksi 169-moddasi 3-qismining “b” bandi (kompyuter tizimiga ruxsatsiz kirib, sodir etilgan o‘g‘rilik) bilan voyaga yetmagan A.X.ni ayblash haqidagi jinoyat ishi ko‘rib chiqildi. Voyaga yetmagan bu o‘smir 11-sonli maktabning 11-sinf o‘quvchisi, maktabda a’lo baholarga o‘qib kelgan, o‘qish joyidan ijobiy tavsiflangan.
Ish holatiga ko‘ra, voyaga yetmagan A.X. o‘zganing mol-mulkini yashirin ravishda talon-toroj qilish maqsadida A.R.ga tegishli bo‘lgan plastik kartasini o‘zi foydalanib kelayotgan Huawei 9 rusumli telefon apparatidagi “Bepul” ilovasiga ro‘yxatdan o‘tkazib olgan.
Mazkur plastik kartada mavjud bo‘lgan 1 million 529 ming so‘m pul mablag‘larini 2020-yil sentabr oyida bo‘lib-bo‘lib qarindoshi H.A.ga tegishli bo‘lgan plastik kartaga o‘tkazib, o‘z ehtiyojlariga sarflab yuborgan.
Sudlanuvchi sud majlisida o‘g‘irlangan pullarni 1XBET internet o‘yiniga tikib yuborgani, shu o‘yinga o‘rganib qolgani sababli oqibatini tushunmay jinoyat sodir etib qo‘yganini, qilmishidan qattiq pushaymonligini bildirgan.
Sud sudlanuvchining aybiga to‘liq iqrorligi va qilmishidan pushaymonligi, muqaddam sudlanmaganligi, o‘qish joyidan ijobiy tavsiflangani, jabrlanuvchiga yetkazilgan moddiy zarar qoplanganligi va voyaga yetmaganligini hisobga olib, aslida mazkur jinoyat uchun qonunda faqatgina ozodlikdan mahrum qilish jazosi tayinlanishi belgilangan bo‘lsa-da, Jinoyat kodeksining 57-moddasini qo‘llab, kodeksning 841-moddasi tartibida bir yil ozodlikni cheklash jazosi tayinladi. Uning zimmasiga sutkaning soat 20:00 dan soat 06:00 gacha bo‘lgan vaqtida yashash joyidan chiqmaslik va nazorat qiluvchi organning roziligisiz yashash joyini o‘zgartirmaslik, Farg‘ona viloyati hududidan tashqariga chiqmaslik kabi qo‘shimcha taqiqlar yuklandi.
Bundan avval Toshkentda bankomatdan 82 million so‘m o‘g‘irlashga uringan 26 yoshli yigit qo‘lga olingani, Kattaqo‘rg‘on shahrida do‘kondan 8 million so‘mlik telefonlarni o‘g‘irlagan jinoiy guruh qo‘lga olingani hamda Toshkent shahri va viloyatida 30 ga yaqin avtomobilni talon-toroj qilgan guruh ushlangani haqida xabar berilgandi.
Izoh (0)