23 март куни Сувайш каналида саёзликка ўтириб қолган Ever Given контейнер кемаси сув юзасига кўтариб олишди, деб ёзади «РБК». Бу ҳақда Bloomberg Inchcape транспорт компаниясига таяниб хабар берган. Канал қачон очилиши ва кемалар қатнови тикланиши ҳозирча номаълум.
Агентлик маълумотларига кўра, қутқарувчилар жамоаси 27 минг метр куб қумни қазиб олиб ташлаганидан кейин қутқарув операциясида муваффақиятга эришилган.
23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемалардан иборат тирбандлик юзага келган эди, деб ёзади Bloomberg.
Кема ушбу канал орқали ҳаракатни бутунлай тўхтатиб қўйганди. Дастлаб кемалар қатнайдиган йўлни очишга икки-уч кун кетиши тахмин қилинган эди. Аммо Ever Given’ни саёзликдан чиқариб олишга уринаётган Boskalis компанияси раҳбари Питер Бердовски бунга ҳафталаб вақт кетиши мумкинлигини айтганди.
Кейинроқ Ever Given контейнер ташувчи кемаси атрофидаги сув тубини қазиш ишлари бошланди. Сув тубини чуқурлаштириш ишлари махсус кемалар ёрдамида контейнер ташувчи кеманинг ҳар томони бўйлаб олиб борилди. Шунингдек, экскаваторлардан ҳам фойдаланилди, улар кеманинг олд қисмидаги қумни олиб ташлади, улкан шатакчи кемалар эса уни каналнинг чуқурроқ қисмига тортиб боришга уринди.
Ever Given юк кемаси 26 март куни кечқурун ўз жойидан бироз силжитилган эди.
Кемалар қатнови бўйича Lloyd’s List компанияси ҳисоб-китобларига кўра, Сувайш каналида саёзликка тиқилиб қолган Ever Given контейнер ташувчи кемаси томонидан кемалар йўлининг тўсиб қўйилиши жаҳон савдосига соатига 400 миллион долларга тушаётган эди. Мисрнинг Ever Given билан боғлиқ вазиятдан кўраётган талафоти кунига 14 миллион долларга баҳоланганди.
Аввалроқ, Миср президенти Абдул ас-Сисий контейнер кемасини юклардан бўшатишга тайёргарлик кўришни бошлашни буюрган, кемадан юкларни тушириш 30 март куни бошланиши мумкинлиги айтилган эди.
Мавзуга доир:
Изоҳ (0)