Тошкент шаҳар ҳокимлиги коронавирусга чалиниш ҳолатлари кўпайган туманда жойлашган мактабларни онлайн таълим шаклига ўтказиши мумкин. Бу ҳақда ҳокимлик матбуот хизмати маълум қилди.
Қайд этилишича, бугунги кунда Тошкент шаҳар ҳокимлиги томонидан мактабларнинг санитар ҳолати ва янги чоракка тайёргарлик ишлари карантин қоидаларинга тўлиқ риоя қилинган ҳолда ташкил этилишини қатъий назоратга олган. Мактаблар маъмуриятига санитария-гигиена талабларига қатъий риоя этиш бўйича аниқ топшириқлар берилган ва уларнинг ижроси тўлиқ назоратга олинган.
Санитария-эпидемиологик осойишталик марказининг Тошкент шаҳар бошқармаси маълумотига кўра, ҳозир ҳам ҳар куни 100 дан ортиқ фуқароларда вирус аниқланмоқда. Ушбу эпидемиологик вазиятни инобатга олган ҳолда 4-чорак дарслари пойтахтдаги умумтаълим мактабларида гибрид шаклда давом эттирилиб, таълим шаклини танлаш ота-оналарга ҳавола этилади.
Эпидемиологик ҳолат оғирлашган туманларда, маҳаллий ҳокимлик органларига карантин талабларини кучайтириш чораларини кўриш ваколати берилганини инобатга олиб, Тошкент шаҳар ҳокимлиги касаллик кўпайган туман мактабларини онлайн таълим шаклига ўтказиши мумкин.
«Бундай вазият юзага келмаслиги учун барчадан санитария-гигиена қоидалари ва карантин талабларига тўлиқ риоя этишни сўраймиз. Ҳозирги шароитда болаларимизнинг ўқиш жараёнини тўлиқ ва сифатли ташкил этиш ижро ҳокимияти, мактаб маъмурияти, ота-оналар ва ўқувчилар орасида ўзаро ҳурмат ва ҳамкорликда амалга оширилади», — дейилади ҳокимлик хабарида.
Эслатиб ўтамиз, баҳорги таътилдан аввал Ўзбекистонда, айниқса Тошкент шаҳрида аҳоли, жумладан, ёшлар ўртасида коронавирус билан касалланиш кўрсаткичлари орта бошлади. Хусусан, Тошкентдаги 77 та мактабда ўқувчилар орасида коронавирус инфекцияси аниқланган. Шу сабабли вирус қайд этилиши кўпроқ кузатилган Мирзо Улуғбек, Чилонзор ва Юнусобод туманларида таълим онлайн шаклга ўтказилган эди.
Изоҳ (0)