Toshkent shahar hokimligi koronavirusga chalinish holatlari ko‘paygan tumanda joylashgan maktablarni onlayn ta’lim shakliga o‘tkazishi mumkin. Bu haqda hokimlik matbuot xizmati ma’lum qildi.
Qayd etilishicha, bugungi kunda Toshkent shahar hokimligi tomonidan maktablarning sanitar holati va yangi chorakka tayyorgarlik ishlari karantin qoidalaringa to‘liq rioya qilingan holda tashkil etilishini qat’iy nazoratga olgan. Maktablar ma’muriyatiga sanitariya-gigiyena talablariga qat’iy rioya etish bo‘yicha aniq topshiriqlar berilgan va ularning ijrosi to‘liq nazoratga olingan.
Sanitariya-epidemiologik osoyishtalik markazining Toshkent shahar boshqarmasi ma’lumotiga ko‘ra, hozir ham har kuni 100 dan ortiq fuqarolarda virus aniqlanmoqda. Ushbu epidemiologik vaziyatni inobatga olgan holda 4-chorak darslari poytaxtdagi umumta’lim maktablarida gibrid shaklda davom ettirilib, ta’lim shaklini tanlash ota-onalarga havola etiladi.
Epidemiologik holat og‘irlashgan tumanlarda, mahalliy hokimlik organlariga karantin talablarini kuchaytirish choralarini ko‘rish vakolati berilganini inobatga olib, Toshkent shahar hokimligi kasallik ko‘paygan tuman maktablarini onlayn ta’lim shakliga o‘tkazishi mumkin.
“Bunday vaziyat yuzaga kelmasligi uchun barchadan sanitariya-gigiyena qoidalari va karantin talablariga to‘liq rioya etishni so‘raymiz. Hozirgi sharoitda bolalarimizning o‘qish jarayonini to‘liq va sifatli tashkil etish ijro hokimiyati, maktab ma’muriyati, ota-onalar va o‘quvchilar orasida o‘zaro hurmat va hamkorlikda amalga oshiriladi”, — deyiladi hokimlik xabarida.
Eslatib o‘tamiz, bahorgi ta’tildan avval O‘zbekistonda, ayniqsa Toshkent shahrida aholi, jumladan, yoshlar o‘rtasida koronavirus bilan kasallanish ko‘rsatkichlari orta boshladi. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan. Shu sababli virus qayd etilishi ko‘proq kuzatilgan Mirzo Ulug‘bek, Chilonzor va Yunusobod tumanlarida ta’lim onlayn shaklga o‘tkazilgan edi.
Izoh (0)