28 март куни деярли бутун Ўзбекистон бўйлаб кузатилган ёғингарчилик Сирдарё вилоятида ҳам кўп ноқулайликлар келтириб чиқарди. «Сирдарё хабарлари» нашрининг ёзишича, кучли ёмғир вилоятдаги кўприклардан бирига шикаст етказган, айрим туманлардаги қишлоқларнинг йўлларини сув босган.
Ёғингарчилик оқибатида зарар кўрган Тошкент—Душанбе йўлида йўл ўтказгич.
Ижтимоий тармоқларда кучли ёғингарлик оқибатида Гулистон шаҳрига кириб келувчи йўл ўтказгичлардан бири жиддий шикастлангани тасвирланган суратлар тарқалди.
Таъкидланишича, Гулистон шаҳрига олиб кирадиган бошқа бир кўприк бугунги кунда таъмирланаётгани боис беркитилган. Шу сабабли Янгиер шаҳри ва Ховос тумани (Боёвут туманининг айрим ҳудудлари)дан Гулистон шаҳрига келувчи ҳар қандай автотранспорт воситалари шаҳарга фақат мазкур кўприк орқали ҳаракатланиб келмоқда.
Сирдарё вилояти автомобиль йўллари бош бошқармасининг маълум қилишича, М34 Тошкент—Душанбе автомобиль йўлининг 117 километрида жойлашган йўл ўтказгичга шикаст етгани тўғрисида хабар чиққач, Мирзаобод туман йўллардан фойдаланиш унитар корхонаси мутахассислари воқеа жойига етиб борган. Мутахассислар юзага келган носозликни зудлик билан бартараф этган.
«Ижтимоий тармоқлар орқали мурожаат қилган сергак фуқароларимизга миннатдорчилик билдириб қоламиз», — дейилади хабарда.
Кўчалари сув остида қолган Сирдарё тумани аҳолиси.
Ижтимоий тармоқларда тарқалган фотосурат ва видеолавҳалар ҳамда улар остига ёзилган изоҳларга кўра, кучли ёғингарчилик оқибатида Сирдарё туманининг айрим кўчаларини сув босган.«Сирдарё шаҳар Ихлос кўчасидаги ‘тупик’ни аҳволи. Одамлар дарвозасининг тагига клёнкалар қўйган. Машина ўтса, уйнинг ичи сувга тўлар экан. Одамлар уйининг ичига киролмайди. Кимга мурожаат қилиш керак, ёмғир ёғганда юришга йўлак қолмайди, уйларга сув кириб кетади... ҳали ёмғирлар олдинда», — дейилади видеода.
Аввалроқ Пахтачида сел «яп-янги қурилган» кўприкни бузиб юборгани, тумандаги бир қатор йўллар «табиий офатдан зарар кўргани» учун ёпилгани тўғрисида хабар берилганди.
Мавзуга доир:
Изоҳ (0)