Саудия Арабистони валиаҳд шаҳзодаси Муҳаммад бин Салмон ас-Сауд келгуси ўн йилликлар ичида қироллик ҳудудида ўн миллиард дарахт экиш тўғрисидаги дастурни маъқуллади. Бу ҳақда «Korrespondent.net» хабар берди.
Шу билан бирга, валиаҳд шаҳзода «араб биродарлар кўмаги билан яшил Яқин Шарқ» дастурини бошлашни ният қилмоқда, дастур минтақа бўйлаб 40 миллиард дарахт экишни назарда тутади.
«Дунёнинг бош нефть қазиб олувчиси сифатида бизнинг қироллигимиз иқлим ўзгариши оқибатларини енгиш учун ўз зиммасидаги масъулиятни ҳис қилган ҳолда яшил дунё яратиш бўйича ҳам глобал етакчига айланишга интилмоқда», — деди Муҳаммад бин Салмон.
Унинг сўзларига кўра, минтақа учун энг катта экологик муаммо бу чўлланишдир. «Қум бўронларидан кўриладиган йиллик зарар 13 миллиард долларни ташкил қилади, шунингдек, ҳавонинг иссиқхона газлари билан ифлосланиши Саудия Арабистонидаги умр давомийлигининг 1,5 йилга қисқаришига олиб келди. «Шунинг учун бизнинг ҳаракатларимиз табиий ўсимликларни кўпайтириш, углерод чиқиндиларини камайтириш, ифлосланиш ва ер деградациясига қарши курашишга қаратилади », — деди шаҳзода.
Муҳаммад бин Салмоннинг таъкидлашича, Саудия қироллиги «сайёрани ҳимоя қиладиган яшил йўл харитасини ишлаб чиқишда» бошқа мамлакатлар билан ҳамкорлик қилади. У 2016 йилда қабул қилинган «Саудия Арабистони миссияси: 2030» стратегик дастурининг амалга оширилиши фуқароларнинг ҳаёт сифатини яхшилашга имкон беришини таъкидлади.
Эслатиб ўтамиз, швециялик олимлар 1 триллион дарахт экилса, глобал иссиқлик тўхташини маълум қилган эди.
Аввалроқ Австралияда иқлим ўзгаришига қарши курашиш учун миллиард дона дарахт экилиши ҳақида хабар берилганди. Тахминларга кўра, 2050 йилгача давом этадиган мазкур лойиҳа 2030 йилгача 18 миллион тонна иссиқхона газини йўқотишга ёрдам беради.
Изоҳ (0)