Мьянмада ҳукуматни бошқараётган ҳарбийлар мамлакатда сайловлар қайтадан ўтказилганидан кейин бошқарувни янги сайланган вакилларга топширишни ваъда қилди. Бу ҳақда Мьянма Қуролли Кучлари ташкил этилган кун муносабати билан ўтказилган тадбирда мамлакат ҳарбий кучлари бош қўмондони, катта генерал Мин Аун Хлайн маълум қилган, деб ёзмоқда «ТАСС».
«Биз ҳукумат бошқарувини эркин ва ҳалол сайловлар ўтказилганидан кейин топширамиз», — деган генерал Мин Аун Хлайн.
У Мьянмада 2020 йилда ўтказилган сайловларнинг натижалари қалбакилаштирилганидан кейин ҳарбий давлат тўнтаришининг юз бериши табиий ҳолат эканлигини таъкидлаган.
Мьянма ҳарбийлари 1 февраль куни мамлакатда фавқулодда ҳолат эълон қилди ва давлат бошқаруви шакли аралаш ҳукуматга ўзгарди. Армия вакиллари 2020 йил ноябрь ойида бўлиб ўтган сайловлардаги овозлар қалбакилаштирилганини билдирган ва Вазирлар Маҳкамасининг янги таркибини шакллантирган. Республика фуқаролари февралдан ҳарбийларнинг мазкур ҳаракатларига қарши норозилик намойиши ўтказишни бошлаган, мамлакатда кучишлатар тизим ҳамда фуқаролар ўртасида кескин тўқнашувлар содир бўлмоқда. 25 март куни Мьянмада ҳарбийларнинг ҳукумат бошқарувига қарши ҳаракати ва демократия тарафдори бўлган фаолларнинг навбатдаги намойишлари қайта бошланган. Маълумотларга кўра, 1 февралдан бери ҳарбийлар ҳамда фуқаролар ўртасида кузатилган тўқнашувларда 300 нафардан зиёд одам ҳалок бўлган.
БМТ бош котиби Антониу Гутерриш ҳарбийлар ҳаракатларини «Мьянмада амалга оширилган демократик ислоҳотларга жиддий зарар етказиш» дея қоралаган. Европа Иттифоқи Мьянмадаги вазият юзасидан 11 кишига қарши санкция эълон қилган.
Мьянмада ҳокимият тепасига келган ҳарбийлар мамлакатнинг собиқ етакчиси, давлат маслаҳатчиси Аун Сан Су Чжи ноқонуний равишда 600 минг АҚШ доллари ва ундан бироз кўпроқ бўлган маблағга тенг олтинларни ўзлаштирганликда айбламоқда.
Изоҳ (0)