Япониянинг Ўзбекистондаги элчиси Ёшинори Фужияма ва Ўзбекистон молия вазири ўринбосари Одилбек Исоқов 26 март куни умумий қиймайи 15 миллиард иена (136,5 миллион доллар)ни ташкил этувчи алмашинув ноталарини имзолади. Бу ҳақда Япониянинг Ўзбекистондаги элчихонаси матбуот хизмати хабар берди.
Маълум қилинишича, ушбу маблағ 0,01 фоиз фоиз ставка ва 15 йиллик муддати билан тақдим этилган. Унинг 4 йили имтиёзли давр ҳисобланиб, Ўзбекистонга COVID-19 инқирозининг оқибатлари билан курашиш учун молиявий кўмак тарзида ажратилган.
«Коронавирус пандемияси туфайли иқтисодий ва ижтимоий фаолият, жумладан, гуманитар алмашинув ва логистика глобал миқёсда тўхтаб қолмоқда. Бу бутун халқаро ҳамжамият, шу жумладан, Япония ҳам пандемия тугаганидан сўнг ўзаро биргаликда салбий таъсирларни енгиб ўтиш ва ривожланишга олиб бориш учун биргаликда ҳал қилиш керак бўлган муаммо», — дейилади хабарда.
Аввалроқ Ўзбекистон Япония халқаро ҳамкорлик агентлиги (JICA)дан жами қиймати 333,4 миллион доллар бўлган иккита кредит жалб қилишни режалаштираётгани тўғрисида хабар берилганди.
Ҳужжат лойиҳасига кўра, JICA қуйидаги қарз маблағларини ажратишга розилик билдирган:
- Ўзбекистонда коронавирус пандемияси оқибатларига қарши чоралар кўриш учун — 15 миллиард япон иенаси миқдоридаги маблағларни 15 йил муддатга, шу жумладан, 4 йиллик имтиёзли давр билан йиллик 0,01 фоизда;
- «Ривожлантириш сиёсатини қўллаб-қувватлаш» лойиҳасини амалга ошириш учун — 195 миллион долларни 25 йил муддатга, шу жумладан, 7 йиллик имтиёзли давр билан Libor ставкаси (6 ойлик) бўйича + йиллик 1,1 фоизда.
Изоҳ (0)