Қашқадарё вилоятининг Қамаши туманида 8-синф ўқувчисининг жинсий зўравонлиги сабаб 14 ёшли қиз 15 ёшида фарзандли бўлди. Вилоят прокуратураси ахборот хизмати раҳбари Жасур Шукуровнинг «Дарё»га маълум қилишича, зўравонлик қилган 8-синф ўқувчиси вояга етмагани учун туман ИИБ уни жавобгарликка тортишни рад этган.
Воқеа тафсилотларини ўрганишни мақсад қилган «Дарё» мухбири Қамаши туманининг «Чим» маҳалла фуқаролар йиғинида бўлиб, зўравонликдан жабрланган қиз, унинг оиласи ва масъуллар билан суҳбатлашди.
«Қизим 2019 йил май ойида кўричак касаллиги билан оғриди. Шу сабаб уни даладаги ишларимизга олиб кетолмадик. Одатдаги турмуш тарзимизда мен ва турмуш ўртоғим далага помидор экиб, деҳқончилик қилардик. Қизимни даладаги ишларга олиб чиқолмаганимиз сабаб яқин қўшнимиз, аммам — отамнинг синглисига тайинлаб, унга қараб туришини илтимос қилдим. Ўша куни аксига олиб, аммам ҳам овқатни тайёрлаб, далага ишлагани кетган. Ва қизим учун овқат олиб бориш масъулияти унинг ўғлига, қизимнинг синфдошига юклатилган. Минг афсуски, ўша куни кўз олдимда, отасиз катта бўлган бола қизимнинг номусига тегган. У ёшлигидан ёнимда ўсгани учун ундан бу хатти-ҳаракатни кутмагандим», — дейди номуси топталган қизнинг онаси.
14 ёшида номуси топталиб, 15 ёшида она бўлган ўқувчи қизнинг айтишича, қариндоши унинг оғзини қўли билан ёпиб, қўлини орқага қайирган ҳолда зўрлаган.
«2019 йил май ойида кўричак бўлдим. Шу сабаб аям мени далага ишлаш учун олиб кетмади. Ўша куни синфдош қариндошим уйга овқат олиб келди. Уйда ўтиргандик, менга китоб ва дафтарларингни ол, дарс қиламиз, деди. Мен ўрнимдан туриб, шкафдан китобларимни олаётгандим, ёнимга келиб оғзимни ёпиб, қўлимни орқага қайириб мени зўрлади. Мен эса қаршилик кўрсатдим, аммо қўлимдан келмади. Кейин эса мен сенга уйланаман, бўлиб ўтган воқеани ҳеч кимга айтма. Айтсанг, ўлдираман деди», — дейди номуси топталган ўқувчи қиз.
Қизнинг айтишича, бундай зўравонлик икки марта рўй берган.
«Қариндош синфдошим эртаси куни ҳам уйимизга югуриб келди. Мен қўрқиб, деразадан ошиб қочмоқчи бўлдим. Аммо ушлаб олди ва яна зўрлади. Яна менга уйланишини айтиб, ўртамизда бўлиб ўтган воқеани ҳеч кимга айтмаслигим лозимлигини айтди. Агар воқеани кимгадир айтсам, ўлдириб юборишини ҳам қўшимча қилди», — дейди «Дарё» мухбири билан суҳбатлашган ўқувчи қиз.
Қизи таҳсил олувчи мактабда фаолият олиб борувчи онанинг айтишича, у қизининг номуси топталганини ва қорнида ҳомиласи борлигини 2019 йилнинг 31 декабрь куни билган.
«2019 йил 31 декабрь куни қизим синфдошлари билан Янги йил байрамини нишонлаш учун кетаётганини айтиб, рухсат сўради. Мен эса қизимга репититорга қатнаётган бўлсанг, бундай базмларни қўй. Ё дарсни танла ёки тадбирларни, дедим. Шунда аммамнинг ўғли келиб, хола, қизингизни ўтиришга юборинг, деди. Роса ялинишгач, хўп, деб рухсат бердим. Шу куни йўлда кетаётганда қизим аммамнинг ўғлига ундан ҳомиладор эканлигини айтиб, қорни чиқиб қолаётгани учун уйдагиларга айтиши кераклигини билдирган. Аммамнинг ўғли эса, буни кимгадир айтса, ўлдириб юборишини айтиб, қўрқитган. Ва энг ёмони, қизимга ўзини қандай ўлдириши кераклигини ўргатган», — дейди қизнинг онаси.
Номуси топталган ўқувчи қиз ҳам онасининг гапини тасдиқлаб, унга зўравонлик қилган қариндоши ҳомиласи борлигини эшитгач, қорнига қайчи ёки пичоқ санчиб, ўзини ўлдиришини маслаҳат берган.
«Ўша куни синфдошлар билан ўтиришга кетаётганимизда қариндошимизга мени зўрлагани сабаб ҳомиладор бўлиб қолганимни айтиб, қорним катталашиб кетаётгани учун уйдагиларга айтишимиз кераклигини айтдим. У эса уйдагиларга айтсам, мени ўлдириб юборишини, ўлигимни ҳеч ким тополмаслигини айтиб қўрқитди. Ва бу вазиятдан қутилиш учун иккаламиз ҳам ўзимизни ўлдиришимиз кераклигини билдирди. Ўзимни ўлдиришим учун қорнимга қайчи ёки пичоқ тиқишимни маслаҳат берди», — дейди 15 ёшида она бўлган ўқувчи қиз.
Таъкидланишича, зўравонлик қилган 14 ёшли йигит ўша куни уйига қайтгач, ўз жонига қасд қилган.
«Бир куни аммам уйга келиб, ўғлининг ўқишини Қарши шаҳридаги мактабларнинг бирига ўтказаётганини айтиб қолди. Кейин билсам, ўғли ўз жонига қасд қилиш учун ўзини осган экан, буни кўриб қолган уйдагилари уни бу йўлдан қайтариб, бошқа мактабга кўчиришибди», — дейди онаизор.
Номуси топталган ўқувчи қизнинг онасига кўра, зўравонлик қилган боланинг онаси воқеадан хабар топгач, қизининг шаънига ёмон сўзлар айтиб, уларни ҳақорат қилган.
«Аммам бор воқеадан хабар топгач, бизникига келди ва менга ҳеч нарса демай, фақат қизимнинг соғлиғини сўради. Менинг умуман хаёлимга ҳам келмабди. Қизим яхши, кўричак бўлганди, даволатдик дебман. Кейин билсам, аммам бор воқеани ўғлидан эшитгач, қизимни келиб кўрган экан. Мен ҳам воқеадан хабар топганимдан сўнг, аммамнинг олдига бориб, бўлар иш бўлибди, энди нима қиламиз деб маслаҳат сўрадим. Аммам дастлаб, хўп, ўзим келин қиламан, деди. Кейинчалик эса, қизингнинг ўзи бузуқ бўлган, фарзанди ҳам ўғлингнинг синфдошларидан ёки укангдан экан, деди. Мен эса, бу туҳматларга чидадим. Яратганга шукурки, ДНК текширувида набирам аммамнинг ўғлидан эканлиги исботланди. Аммо булар ДНК таҳлилини сотиб олгансизлар, деб ҳам уруш қилди», — дейди ўқувчи қизнинг онаси.
Зўравонликка учраган қизнинг онаси қизини зўрлаган бола ҳамон жавобгарликдан озод бўлиб қолаётганини айтмоқда.
«Мен ўша зўравоннинг жавобгарликка тортилишини сўраб, Президент порталига, Ички ишлар вазирлигига, шунингдек, барча ташкилотларга мурожаат қиляпман. Аммо ҳеч ким мурожаатимга эътибор қаратмаяпти. Қизим зўравонлик қурбони бўлиб қолаверадими, қани адолат?», — дейди қизнинг онаси.
Мазкур воқеа ҳақида фикр билдирган «Чим» МФЙ раиси Равшан Эгамбердиев ҳамда раис ўринбосари Юлдуз Жабборова номуси топталган қизни ёлғиз қолдирмай, ҳолидан хабар олиб турганини айтмоқда.
«Мен воқеадан 2020 йил январь ойида хабардор бўлдим ва ўша пайтнинг ўзида қизимизнинг ҳолидан хабар олдим. Даволатишимиз керак экан, даволатдик ва маҳалламиздаги патронаж ҳамширадан илтимос қилиб, унинг соғлиғини назорат қилиб турибмиз. Дастлаб барчаси яхши эди. Боланинг онаси қизни келин қилишини айтганди. Аммо кимдир унинг фикрини бузганми, эндиликда қизни келин қилишдан бош тортиб, қиз томон унинг ўғлига туҳмат қилаётганини айтмоқда», — дейди «Чим» МФЙ раиси ўринбосари Юлдуз Жабборова.
Қамаши туман ҳокимининг хотин-қизлар масалалари бўйича маслаҳатчиси, туман маҳалла ва оилани қўллаб-қувватлаш бўлими бошлиғининг биринчи ўринбосари Саида Тошниёзова лавозимига икки ой илгари тайинлангани сабаб воқеадан энди хабар топганини, қиз ёки унинг онаси ўтган вақт давомида унга мурожаат қилиб, кўмак сўрамаганини билдирди.
«Шундай бўлса-да, бугундан бошлаб (2021 йил 26 март) қизимизга ўзимиз кўмаклашамиз ва ёшларнинг имкон қадар оила қуриб, аҳил яшаши учун қўлимиздан келганини қиламиз», — дейди Саида Тошниёзова.
«Дарё» мухбири билан суҳбатлашган 4-мактаб директори Жўра Тиллаев воқеа мактаб тарихида биринчи маротаба содир бўлганини, шунингдек, воқеа содир бўлган пайтда ўқувчилар ёзги таътилда бўлганини билдирди.
«Тўғриси, ўзимиз ҳам воқеани эшитиб шокка тушиб қолдик. Умуман кутилмаган воқеа бўлди. Эшитишимиз билан синф раҳбари, мактаб психологи, Ёшлар иттифоқи етакчиси биргаликда қизимизни бориб кўрдик ва зудлик билан туғруқхонага ётқиздик. Аммо ҳали туғруқ вақти етмаган экан», — дейди мактаб директорининг маънавий –маърифий ишлар бўйича ўринбосари Шоҳида Чориева.
Шоҳида Чориева ҳамда мактаб психологи Шаҳноза Дўстёроваларнинг қўшимча қилишича, қизнинг ҳомиласи етти ойлик бўлса-да, дарс давомида умуман сезилмаган.
«Дарё» мухбири мазкур воқеани ўрганган ИИБ қандай хулосага келганини билиш мақсадида вилоят ИИБ ахборот хизмати раҳбари Ирода Расулова билан суҳбатлашди. Масъул бу ҳақдаги расмий муносабатни вилоят прокуратураси бериши лозимлигини айтиб, ахборот беришдан бош тортди.
Қашқадарё вилоят прокуратураси ахборот хизмати раҳбари Жасур Шукуров эса, воқеа прокуратура терговчилари томонидан ўрганилаётганини, жараён ҳали якунланмаганини, прокуратура зўравонлик қилган ўқувчини жавобгарликка тортишни рад этган ИИБ ходимининг хатти-ҳаракатига тез орада ҳуқуқий баҳо беришини маълум қилди.
«Дарё» воқеалар ривожини кузатишда давом этади.
Изоҳ (0)