Зангиота юқумли касалликлар шифохонасида коронавирусдан даволанаётган 99 ёшли фуқаро соғайиб чиқди, дея хабар бермоқда Соғлиқни сақлаш вазирлиги.
Маълум қилинишича, 2021 йилнинг 14 март куни Зангиота юқумли касалликлар шифохонасига 1922 йилда туғилган фуқаро Т.Т. коронавирус ташхиси билан олиб келинган.
Беморда ўтказилган ПЗР тести натижалари мусбат чиққан, рентген текширувларида икки томонлама гидроторакс суюқлик аниқланган.
«Даволаш жараёнида торакал жарроҳлик йўли билан беморнинг ўпкасидан 10 кун давомида 4 марта, жами 2 литр суюқлик олинди. Бемор кичик операциядан ҳам муваффақиятли чиқди, икки ҳафта давомида интенсив даво муолажалари ўтказилди. Шу тарзда беморнинг аҳволи ижобий томонга ўзгара бошлади. Ниҳоят, муолажалардан сўнг олинган ПЗР тести манфий натижани кўрсатди», — дейди шифохонанинг реанимация бўлими мудири Доно Жўламанова.
Бундан ташқари, беморда ҳамроҳ касалликлар ҳам мавжуд бўлган. Бемордаги юрак етишмовчилиги асоратлари ҳам тезда бартараф этилган.
Таъкидланишича, онахон уйига кетиши учун жавоб берилган.
Эслатиб ўтамиз, Ўзбекистонда 25 март, пайшанба куни 144 кишида коронавирус инфекцияси тасдиқланди. Ушбу бир сутка давомида Қорақалпоғистонда бир киши, Тошкент вилоятида 21 киши, Тошкент шаҳрида эса 83 киши, республика бўйича жами 105 киши COVID-19 касаллигидан соғайган. Соғайиш кўрсаткичи 98 фоизни ташкил этмоқда.
Коронавирус кенг тарқалишининг олдини олиш мақсадида Тошкентдаги айрим мактабларда ўқиш босқичма-босқич масофавий шаклга ўтказилмоқда, бозор ва савдо марказларида карантин талаблари кучайтирилди.
Тошкент шаҳридаги такси ва қурилиш соҳасида карантин чоралари кучайтирилиши, пойтахт ҳокимлиги ва унинг тизимидаги барча тузилмаларда турли йиғилишларни ўтказиш тақиқлангани ҳақида хабар берилди.
Шунингдек, Ўзбекистонда 1 апрелдан оммавий тадбирлар ўтказишга айрим чекловлар ўрнатилади. Тўйларда меҳмонлар сони чекланади. Бундан ташқари, ССВ 24 март куни 10 февралдан бери биринчи марта Ўзбекистонда коронавирус оқибатида бемор вафот этгани ҳақида ахборот берди.
Изоҳ (0)