Шимолий Корея баллистик ракета учирди. Бу ҳақда Япония Мудофаа вазирлигининг баёнотига асосланиб, «РБК» хабар берди.
Вазирлик маълумотларига кўра, ракетанинг учирилиши маҳаллий вақт билан соат 7:00 да (Тошкент вақти билан 3:00) амалга оширилган. Вазирлик ракета Япония ҳудудига ўтмаслигини маълум қилган. Унинг парвоз траекторияси мамлакатнинг махсус иқтисодий зонасидан чиқиб кетмайди.
Kyodo агентлигининг хабар беришича, Япония бош вазири Ёсихидэ Суга Шимолий Кореянинг баллистик ракета учириши муносабати билан Миллий хавфсизлик кенгаши мажлисини чақирди
Япония Мудофаа вазирлиги ракета учирилишини «бутун халқаро ҳамжамият, шу жумладан, Япония учун жиддий муаммо» деб атаган. Шимолий Кореянинг ҳаракатлари Япония бош вазири томонидан ҳам қораланган.
«Ракетанинг учирилиши мамлакатимиз ва минтақамиз тинчлиги ҳамда хавфсизлигига таҳдид солади, шунингдек, БМТ қарорига зид келади», — деди Суга.
YTN агентлигининг ёзишича, мазкур масала юзасидан Жанубий Корея ҳукумати ҳам фавқулодда йиғилиш чақирган.
Аввалроқ Шимолий Кореянинг қанотли ракеталарни синовдан ўтказгани ҳақида хабар берилганди. Хабарга кўра, Сариқ денгиз минтақасидан иккита ракета учирилган.
The Washington Post газетасининг хабар беришича, АҚШ Мудофаа вазирлиги вакиллари разведка маълумотлари Шимолий Кореянинг ракета синовларини режалаштираётгани ҳақида огоҳлантирган эди.
Газетанинг ёзишича, хабар қилинмаган ракета синовлари КХДР етакчиси Ким Чен Иннинг АҚШ президенти Жо Байденга бўлган биринчи тўғридан-тўғри даъвосини англатади.
Шу билан бирга, АҚШ маъмурияти Шимолий Корея ўтказган қисқа масофага учадиган ракеталарнинг синовини кенг кўламли провокация деб ҳисобламаяпти. Маъмурият вакилларидан бири амалга оширилган синовлар БМТ Хавфсизлик Кенгашининг КХДР тўғрисидаги қарорларига зид эмаслигини қўшимча қилган ва уларни «нормал ҳарбий фаолият» деб атаган.
Аввалроқ Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхеньян билан боғланишга уриниб келгани, аммо Шимолий Корея раҳбарияти бу уринишларни эътиборсиз қолдирганини айтган эди.
Шимолий Корея ҳукумати эса Вашингтон Пхеньянга нисбатан душманлик сиёсатидан воз кечмагунча АҚШнинг янги маъмурияти билан алоқа ўрнатмаслигини айтди. КХДР ташқи ишлар вазири ўринбосарининг таъкидлашича, Пхеньян ва Вашингтон ўртасидаги мулоқот «бир столда тенг ҳуқуқли ўтириб, фикр алмашиш» муҳитини талаб қилади.
Изоҳ (0)