Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.
Венада 7 апрелдан бошлаб дўконларга фақат манфий натижали тести бўлганлар киритилади
Австрия ҳукумати шарқий минтақаларда, шу жумладан, мамлакат пойтахти Венада коронавирусга чалиниш ҳолатларининг кўплиги туфайли, кўпчилик дўконларни 1—6 апрель кунлари ёпиб қўйишга қарор қилди. Пасха байрамлари даврида фақат энг зарур маҳсулотлар билан савдо қилувчи дўконлар, масалан, супермаркетлар ва дорихоналар учун истисно қилинади.Савдо-сотиқ 7 апрелдан қайта тикланади. Шундан кейин шарқий Австрия аҳолиси фақат манфий натижали коронавирус тести билан дўконларга кириши мумкин, дея маълум қилди Австрия соғлиқни сақлаш вазири Рудолф Аншобер. Айни пайтда манфий тест сартарошхоналар ва хизмат кўрсатиш соҳасининг бошқа муассасаларига боришда керак бўлади.
Бундан ташқари, Австриянинг шарқий ҳудудлари аҳолисига ҳар қандай бинода, агар у ерда бир нафардан кўп одам бўлса, ҳамда кўчада одамлар гавжум жойларда FFP2 респираторларини тақиш мажбурияти юклатилди. Шунингдек, компаниялар ўз ходимларига ҳафтасига бир марта коронавирусга тест топширишни мажбурий қилди.
Австрияда пандемия бошидан буён 520 мингдан ортиқ киши коронавирусга чалинган, 9100 дан ортиғи вафот этган. Айни пайтда беморлар сони 30 мингдан ошади.
Ангела Меркель танқидлардан кейин Пасха байрамлари даврида локдаундан воз кечди
Германияда эса канцлер Ангела Меркель Пасха байрамлари даврида қатъий локдаун жорий қилишдан бош тортди. Дастлаб қатъий карантин жорий қилиб, энг зарур маҳсулотларни сотадиган дўконларни ҳам ёпиш режалаштирилган эди. Аммо танқидлар ёғилганидан кейин Меркель локдаун эълон қилмайдиган бўлди ва узр сўради.«Пасха даврида ёпилиш ғоясини энг яхши ниятлар билан ишлаб чиққан эдик. Биз пандемиянинг учинчи тўлқинини зудлик билан тўхтатишимиз ва даф қилишимиз керак», — деди Меркель. Аммо бу чораларни тезкор муддатларда амалга ошириш имконсиз, деди у. Меркель Германия аҳолисидан қўшимча ишончсизлик учун узр сўради. «Бу фақат менинг хатоим», — дея қўшимча қилди у.
Пасха даврида локдаун жорий қилиш қарорини бизнес вакиллари танқид остига олди, улар коронавирусга қарши чораларнинг сусайтирилишига умид қилаётган эди. Тиббий мутахассислар эса, аксинча, таклиф этилаётган чоралар коронавируснинг янада юқумлироқ вариантлари тарқалишини тўхтатиш учун етарли эмас, деб ҳисобламоқда.
Германия коронавирус инфекциясини юқтирган одамлар сони бўйича дунёда ўнинчи ўринни эгаллаб турибди. Мамлакатда жами 2,7 миллион киши касалланган, шуларнинг 75 минги вафот этган. Фаол беморлар сони 175 мингдан ошади.
Грузияда машҳурларни эмлаш учун вакциналар ажратилади
Грузияда машҳур шахсларни эмлаш учун коронавирусга қарши қарийб юзта доза вакцина ажратиш режалаштирилмоқда. Шу тариқа ҳукумат COVID-19’га қарши оммавий вакцинацияни тарғиб қилмоқчи.«Биз бутун дунё курашаётган вакцинадан фойдаланмасликни ўзимизга эп кўрмаймиз. Грузияда кўрсаткичлар жуда паст, аммо вакциналарни тезкорлик билан ўзлаштириш учун салоҳият ҳозирча бор», — деди Грузия соғлиқни сақлаш вазири ўринбосари Тамара Габуния.
Унинг айтишича, агар мамлакатда вакцинация суръатлари ошмаса, ҳукумат 55 ёшдан ошганларни эмлашга рухсат беради, шунингдек, эҳтимолий иккиламчи таъсирлар олдини олиш учун эмланганлар 30 дақиқа эмас, 45 дақиқа давомида кузатувда бўлади.
Айни пайтда Грузия аҳолиси AstraZeneca Англия-Швеция компанияси вакцинаси билан эмланмоқда. Шунингдек, мамлакатга Америка-Германия вакцинаси — Pfizer ҳам етиб келиши кутилмоқда.
Шунингдек:
- Жонс Ҳопкинс университети маълумотларига кўра, АҚШда коронавирусга чалинганлар сони 30 миллион кишидан ошди. Мамлакат ушбу кўрсаткич бўйича дунёда биринчи ўринни эгаллаб турибди. Ундан кейинда Бразилия (12,1 миллион), Ҳиндистон (11,7 миллион) бормоқда. Шунингдек, коронавирусдан ўлимлар сони бўйича ҳам АҚШ дунёда етакчилик қилмоқда — 545,1 минг киши. Бразилияда эса 298,6 минг, Мексикада 199 минг киши COVID-19’дан вафот этган.
- Украинанинг Черновицкая вилоятида AstraZeneca вакцинаси билан эмланган эркак орадан ўн кун ўтиб, вафот этди. Ўлим сабаби сифатида ўткир мия инсульти келтирилмоқда. Унда, шунингдек, оғир сурункали юрак-қон томир касалликлари, диабет ва бошқа ҳамроҳ касалликлар бўлгани айтилмоқда. У 15 март куни Охford/AstraZeneca дориси (Covishield) билан эмланган, ўлими эса 24 март куни қайд этилган.
- Хорватия бош вазири Андрей Пленкович ва соғлиқни сақлаш вазири Гордан Яндрокович AstraZeneca вакцинаси билан коронавирусга қарши эмланди. Мамлакатда COVID-вакцинация 2020 йил 27 декабрда бошланган бўлиб, ҳозиргача 311 мингдан ортиқ аҳоли эмланган.
- Ҳиндистонда коронавирусга чалиниш авж олиб кетгани туфайли, мамлакат ўз ҳудудида ишлаб чиқарилаётган AstraZeneca вакцинасининг чет элга етказиб берилишини тўхтатади ва ўз фуқароларини эмлаш кампаниясини кенгайтиради. Ҳиндистонда 1 апрелдан 45 ёшдан ошган барча аҳолини эмлаш учун рухсат берилди.
Изоҳ (0)