Польшалик ёзувчи Facebook’да президентни «эси паст» деб атагани учун уч йилга қамалиши мумкин

Польшада ёзувчи Якуб Жульчик Facebook ижтимоий тармоғига жойлаган постида мамлакат президенти Анжей Дудани «эси паст» деб атаганликда айбланмоқда, деб ёзади Meduza.

Айблов ҳукумат вакилини ҳақорат қилиш моддаси бўйича қўйилган бўлиб, унда уч йилгача озодликдан маҳрум қилиш назарда тутилади.

Таъкидланишича, 2020 йил 7 ноябрь куни, АҚШдаги президентлик сайловидан уч кун ўтиб Дуда Twitter’да Жо Байденни «муваффақиятли кампанияси» билан табриклаган. У Байденнинг сайловдаги ғалабасини қайд этмаган, буни натижалар ҳали расмийлаштирилмагани ва «сайловчилар коллегиясининг тасдқиғини» кутаётгани билан изоҳлаган.

Ёзувчи Жульчик бу ҳақда ўзининг Facebook саҳифасида изоҳ бериб, азалдан АҚШдаги сиёсат билан қизиқишини, аммо «сайловчилар коллегиясининг тасдиғи» каби ҳодиса ҳақида билмаслигини таъкидлаган. «Жо Байден — АҚШнинг 46-президенти, Дуда — эси паст», деб қўшимча қилган ёзувчи.

Ушбу пости учун сўроққа тортилган Жульчик президентни ҳақорат қилгани тўғрисидаги айбловга иқрор бўлишдан бош тортди. Ёзувчининг сўзларига кўра, унинг ҳаракатлари президентга танқидий баҳодир.

Маълумот учун, Европа давлатлари ичида Польша мамлакат раҳбарлари, давлат рамзлари ва динига қарши жамоатчилик олдида фикр билдириш тўғрисида энг оғир қонунларни қабул қилган. Ушбу қонунлар учун Варшава халқаро ташкилотлар томонидан мунтазам танқид қилиб келинади.