Жаҳон соғлиқни сақлаш ташкилоти (ЖССТ) Тожикистонда полиомиелит (болалардаги мия ярим фалажи) билан касалланиш бўйича бир нечта ҳолатларни қайд этди. Бу ҳақда ташкилотнинг расмий сайтига таяниб, «Asia-Plus» хабар берди.
ЖССТ хабар беришича, 18 март ҳолатига кўра, Тожикистонда айланма вакцинадан келиб чиққан 2-турдаги полиовирусга (АВКП2) чалинган болаларда фалажлик келиб чиққан тўртта ҳолат кузатилган. Шунингдек, беморлар билан мулоқотда бўлган бир қатор кишиларда ҳам АВКП2 ҳолатлари аниқланган.
«Ўткир фалажликка олиб келадиган АВКП2 биринчи бўлиб 2020 йил 22 ноябрда Хатлон вилоятида қайд этилди, ушбу касаллик ҳозирги кунда Покистонда учрайдиган вирус тури билан боғлиқ», — деди ЖССТ.
«8 март куни Ҳисор шаҳри ҳудудида фалажликка олиб келган яна иккита АВКП2 тасдиқланди. Бундан ташқари, мазкур касаллик Душанбедаги янги ташкил этилган кузатув пунктида олинган учта экологик намунада ҳам аниқланди», — дейилади ташкилот ҳисоботида.
Фавқулодда ҳолат эълон қилиниши
ЖССТ Тожикистонда аниқланган АВКП2 ҳолатлари тўғрисидаги маълумотларни кўриб чиқди ва мазкур эпидемияни иккинчи даражали фавқулодда ҳолат деб таснифлади.
Ушбу иккинчи даражали фавқулодда вазият қўшни мамлакатларга ҳам тарқалмоқда, шу сабабли қўшни давлатлар исталган вақтда полиомиелитнинг олдини олиш, аниқлаш ва даволашга тайёр бўлиши керак.
Айни пайтда ушбу юқумли касаллик юзасидан тўлиқ текширув олиб борилмоқда, жумладан, касалхонага ётқизиш, контактларни аниқлаш ва субмиллий даражадаги эмлашни қамраб олувчи маълумотлар кўриб чиқилмоқда.
Касалликни юқтириш бўйича ҳозирги ёки аввалги ҳолатларни аниқлаштириш учун мамлакатда кузатув чоралари кучайтирилди, хусусан, атроф-муҳитдаги полиовирусни кузатиш тизими яратилди.
ЖССТ Полиомиелитни йўқ қилиш бўйича глобал ташаббус (ГПЕИ) ва соғлиқни сақлаш идоралари билан ҳамкорликда АВКП2 вирус занжирини узиш учун полиомиелитга қарши янги вакцина нОПВ2 билан қўшимча эмлаш кампаниясига тайёргарлик кўрмоқда.
ЖССТ таъкидлашича, полиомиелитга қарши ушбу вакцина кучли ичак иммунитетини таъминлайди, полиовирус айнан ичакда кўпаяди.
Аммо иммунизация даражаси паст бўлган популацияда, эмланмаган боланинг биринчисидан иккинчисига вирус узоқ вақт (кўпинча 12—18 ой) давомида тарқалиши сабабли, вирус мутацияга учраши ҳамда ёввойи полиовирус сингари фалажликка олиб келиши мумкин. Ушбу мутацияга учраган полиовирус кейинчалик маҳаллий популяцияларга тарқалиши мумкин, натижада АВКП2 пайдо бўлади.
АВКП2 вирусининг тарқалиши глобал миқёсда 2019 йил бошидан бошлаб кескин ошди. 2020 йилда ушбу вирус билан касалланиш ҳолати Афғонистонда аниқланди, кейинчалик Тожикистон, Туркманистон ва Ўзбекистонга яқин ҳудудларда қайд этилди.
Эслатиб ўтамиз, Тожикистонда 22 мартдан аҳолини коронавирусга қарши эмлаш бошланди. Хабарга кўра, биринчи бўлиб соғлиқни сақлаш вазири Жамолиддин Абдуллозода, унинг ўринбосари Самариддин Ализода ва ЮНИСЕФнинг Тожикистондаги вакили Осама Маккави Когали эмланди.
Изоҳ (0)