Қирғизистон Соғлиқни сақлаш вазирлиги 29 мартдан мамлакатда аҳолини коронавирус инфекциясига қарши эмлашнинг биринчи босқичи бошланишини маълум қилди. Вакцинация Хитойнинг Sinopharm препарати ёрдамида амалга оширилади, деб ёзмоқда Kloop нашри.
Хабарга кўра, ҳар бир кишига вакцина дозаси икки марта, 25—28 кун оралиғида юборилади. Аҳоли ихтиёрий равишда эмланади. Ҳаммаси бўлиб уч босқичли вакцинация амалга оширилади.
Биринчи босқичда тиббиёт ходимлари, таълим муассасалари ходимлари, ҳуқуқ-тартибот органлари ходимлари ва хавфсизлик кучларини эмлаш режалаштирилган.
Иккинчи босқичда клиник хавф омилларига эга кишилар, сурункали касалликларга чалинганлар, аҳолининг ижтимоий заиф гуруҳлари, шунингдек, 60 ёшдан ошганларга вакцина берилади. Қолганлар фақат учинчи босқичда эмланади.
Вакцинациянинг дастлабки босқичи Бишкек, Ўш ва Чуй вилоятида бошланади. Бишкекда бешта, Чуй вилоятида ва Ўшда иккитадан эмлаш марказлари ташкил қилинган.
«Иммунизация бўйича илмий-техник экспертлар кенгаши (НТГЭИ) томонидан вакцинацияга оид ҳужжатларни тасдиқлаш жараёни кетмоқда. Республиканинг барча минтақаларида вакцинацияни ташкил этиш юзасидан тиббиёт ходимлари учун ўқув машғулотлари ўтказилмоқда», — дейилади вазирлик хабарида.
Sinopharm ҳақида маълумот
Қирғизистон 19 март куни COVID-19’га қарши Хитойнинг Sinopharm вакцинаси партиясини қабул қилиб олди. Умумий ҳисобда, мамлакат 150 минг доза вакцинани бепул олди.
Sinopharm вакцинаси — фаоллаштирилмаган (ўлдирилган) вакцина. Препаратни яратишда патоген вирус ёки бактерия ёки бўлмаса уларга ниҳоятда ўхшаш микроорганизмлардан фойдаланилади, улар кимёвий реагентлар, иссиқлик ёрдамида ўлдирилади.
Соғлиқни сақлаш вазирлигининг маълумотларига кўра, Sinopharm препарати ёрдамида Хитой, БАА, Туркия, Ўзбекистон сингари 65 мамлакатда 12 миллиондан ортиқ одам эмлаган. Шунингдек, Sinopharm вакцинаси билан эмлашдан кейин ҳеч қандай иккиламчи таъсирлар қайд этилмаган.
Маълумот учун, Sinopharm вакцинаси Хитойда 2020 йил декабрь ойида рўйхатдан ўтказилди ва коронавирусга қарши қўллаш учун тасдиқланган биринчи Хитой вакцинасига айланди. Препаратнинг самарадорлиги 79 фоиз экани ҳақида хабар берилган.
Изоҳ (0)