Хитой ҳукумати Европа Иттифоқининг 10 нафар парламентарий, олим ва сиёсатчисига нисбатан, шунингдек, тўртта юридик шахсга Шинжон-Уйғур мухтор ҳудудидаги ички сиёсатга аралашувлар сабаб санкция қўллади. Бу ҳақда Хитой ТИВ баёнотига таяниб «ТАСС» хабар берди.
Рўйхатга Европарламентнинг беш нафар депутати — Райнхард Бютикофер, Михаэль Галер, Рафаэль Глюксманн, Ильҳан Кучюк, Мириам Лексман, шунингдек, Нидерландия парламентарийси Сьорд Вимер Сьордсма, Бельгия парламенти аъзоси Самюуэль Коголати, Литва сейми аъзоси Довиле Шакалене, немис олими Адриан Ценц ва швециялик тадқиқотчи Бьорн Ерден киритилган.
«Мазкур шахслар ва уларнинг оила аъзоларига Хитой, Гонконг ва Макао ҳудудига кириш тақиқланади. Шунингдек, уларга тааллуқли компаниялар, институтларга ҳам Хитой билан алоқалар чеклаб қўйилган», — дейилган ТИВ ҳужжатида.Санкциялар рўйхатига ЕИ Сиёсат ва хавфсизлик масалалари қўмитаси, Инсон ҳуқуқлар бўйича Европарламент, Хитойни ўрганиш бўйича Берлиндаги Меркатор институти (MERICS), шу билан бирга Даниянинг «Демократия альянси» нотижорат жамғармаси (Alliance of Democracies Foundation) ҳам кирган.
Хитой ТИВ баёнотида мазкур санкцияларнинг Европа Иттифоқининг чекловларига жавоб тариқасида қўлланилгани қайд этилган.
«Европа Иттифоқининг мазкур ҳаракатида ёлғон ва асоссиз маълумотларга таянилган, ЕИ ҳақиқатни инкор этади ва унга ҳурмат билан муносабатда бўлмаган. Бу халқаро ҳуқуқ ва халқаро муносабатлар асосий нормаларининг қўпол равишда бузилиши Евроиттифоқ ва Хитой ўртасидаги алоқаларга путур етказмоқда. Хитой мазкур чораларга эътирозини билдиради ва санкцияларни қоралайди», — дейилган ҳужжатда.
«Хитой Евроиттифоқни бу каби ҳаракатлар борасида сермушоҳада бўлиш, қилмишлар оқибатини ўйлаш, хатоларни тўғирлаш ва инсон ҳуқуқлари борасида ноталар беришни тўхтатиш, иккиюзламачилик асосида шаклланган ёлғон стандратлар қабул қилмаслик ва бошқа мамлакатларнинг ички ишларига аралашмасликка, шунингдек, нотўғри йўлдан қайтишга чақиради. Акс ҳолда Хитой келажакда янада кескин чоралар қўллаши мумкин», — дейилади Хитой ТИВ баёнотида.
Мавзуга доир: АҚШ ва Хитой бир-бирини қонунбузарликда айбламоқда
Шунингдек, Европа Иттифоқи Мьянмадаги вазият учун жавобгар бўлган 11 кишига қарши санкциялар эълон қилиши ҳақида ҳам хабар берилган.
Изоҳ (0)