Таиланд 22 март куни кўнгиллилар билан коронавирусга қарши ўзининг маҳаллий вакцинасининг клиник синовини бошлади. Бу ҳақда «Интерфакс» хабар берди.
«Таиландликлар учун ишлаб чиқарилган маҳаллий вакцина кейинги йилдан фойдаланила бошлайди», — деди Маҳидол Университети кенгашининг раиси Пиясакол Саколсатаядорн.
Препарат фармацевтика давлат компанияси томонидан Маҳидол университетининг Тропик тиббиёт кафедраси ва Американинг нотижорат ташкилотлари билан биргаликда ишлаб чиқилмоқда. Клиник синовларда 460 нафар кўнгилли иштирок этади.
Синовларнинг иккинчи босқичи июль ойига режалаштирилган ва натижалар йил охирига қадар олинади.
Таиланд соғлиқни сақлаш вазири Анутин Чарнвиракул маҳаллий вакцина Таиландга кўпроқ имкониятлар беради, деб ҳисоблайди. Айни пайтда Чулалонгкорн университети матрицали рибонуклеин кислота технологиясидан фойдаланган ҳолда яна бир Таиланд вакцинасини ишлаб чиқмоқда. У ҳозирча синовдан ўтказилмади.
Маълумот учун, Таиланд бош вазири Прают Чан-Оча AstraZeneca вакцинасининг биринчи дозасини қабул қилди. У мамлакатда хавфсизлик нуқтаи назаридан препаратни қўллаш тўхтатилганидан кейин ушбу дори билан эмланган биринчи одам бўлди.
Пандемия бошидан буён Таиландда 27 мингдан ортиқ коронавирус билан касалланиш ва 91 та ўлим ҳолати қайд этилди.
Аввалроқ Эронда ҳам коронавирусга қарши маҳаллий вакцинанинг клиник синовлари бошлангани ҳақида хабар берилган эди. Эронлик мутахассислар томонидан ишлаб чиқарилган вакцина билан дастлабки иккита кўнгилли, жумладан, вакцинани ишлаб чиқаришга масъул бўлган Имом Хумайний буйруқларини бажариш бўйича штаб раисининг қизи эмланган.
Шунингдек, Қозоғистонда кўнгиллиларни коронавирусига қарши маҳаллий QazCovid-in вакцинаси билан эмлаш бошлангани тўғрисида маълум қилинган.
Изоҳ (0)