Tailand 22-mart kuni ko‘ngillilar bilan koronavirusga qarshi o‘zining mahalliy vaksinasining klinik sinovini boshladi. Bu haqda “Interfaks” xabar berdi.
“Tailandliklar uchun ishlab chiqarilgan mahalliy vaksina keyingi yildan foydalanila boshlaydi”, — dedi Mahidol Universiteti kengashining raisi Piyasakol Sakolsatayadorn.
Preparat farmatsevtika davlat kompaniyasi tomonidan Mahidol universitetining Tropik tibbiyot kafedrasi va Amerikaning notijorat tashkilotlari bilan birgalikda ishlab chiqilmoqda. Klinik sinovlarda 460 nafar ko‘ngilli ishtirok etadi.
Sinovlarning ikkinchi bosqichi iyul oyiga rejalashtirilgan va natijalar yil oxiriga qadar olinadi.
Tailand sog‘liqni saqlash vaziri Anutin Charnvirakul mahalliy vaksina Tailandga ko‘proq imkoniyatlar beradi, deb hisoblaydi. Ayni paytda Chulalongkorn universiteti matritsali ribonuklein kislota texnologiyasidan foydalangan holda yana bir Tailand vaksinasini ishlab chiqmoqda. U hozircha sinovdan o‘tkazilmadi.
Ma’lumot uchun, Tailand bosh vaziri Prayut Chan-Ocha AstraZeneca vaksinasining birinchi dozasini qabul qildi. U mamlakatda xavfsizlik nuqtayi nazaridan preparatni qo‘llash to‘xtatilganidan keyin ushbu dori bilan emlangan birinchi odam bo‘ldi.
Pandemiya boshidan buyon Tailandda 27 mingdan ortiq koronavirus bilan kasallanish va 91 ta o‘lim holati qayd etildi.
Avvalroq Eronda ham koronavirusga qarshi mahalliy vaksinaning klinik sinovlari boshlangani haqida xabar berilgan edi. Eronlik mutaxassislar tomonidan ishlab chiqarilgan vaksina bilan dastlabki ikkita ko‘ngilli, jumladan, vaksinani ishlab chiqarishga mas’ul bo‘lgan Imom Xumayniy buyruqlarini bajarish bo‘yicha shtab raisining qizi emlangan.
Shuningdek, Qozog‘istonda ko‘ngillilarni koronavirusiga qarshi mahalliy QazCovid-in vaksinasi bilan emlash boshlangani to‘g‘risida ma’lum qilingan.
Izoh (0)